تائپے//ہندوستان کے اسٹار بیڈمنٹن کھلاڑی پاروپلی کشیپ نے تائپے اوپن 2022 میں جیت کے ساتھ اپنی مہم کا آغاز کیا ہے۔ بدھ کے روز کھیلے گئے مردوں کے سنگلس کے پہلے راونڈ میں کشیپ نے چینی تائپے کے چی یو جین کو شکست دے کر دوسرے راونڈ میں داخلہ حاصل کیا۔کشیپ نے یو جین کو24-22، 21-10 سے شکست دی۔
پہلے گیم میں بہت سخت مقابلہ ہوا لیکن دوسرا گیم انتہائی یکطرفہ رہا۔ کشیپ کو آخری بار سنگاپور اوپن 2022 میں دیکھا گیا تھا، جس میں وہ مردوں کے سنگلس زمرے کے پہلے راونڈ میں ہار گئے تھے۔ کشیپ کو انڈونیشیا کے جوناتھن کرسٹی نے 37 منٹ تک جاری رہنے والے میچ میں 21-14، 21-15 سے شکست دیتھی۔مردوں کے سنگلس کے دوسرے میچ میں متھن منجوناتھ نے پہلے راونڈ میں ڈنمارک کے کم برون کے خلاف جیت کے ساتھ دوسرے راونڈ میں داخلہ لیا۔
منجوناتھ نے برون کو سیدھے گیمس میں 21-17، 21-15 سے شکست دی۔ منجوناتھ نے آخری بار سنگاپور اوپن 2022 میں بھی حصہ لیا تھا، جہاں وہ دوسرے راونڈ میں ہار کرباہر ہو گئے تھے۔دوسری جانب خواتین کے سنگلس زمرے میں ہندوستان کی مالویکا بنسوڑ پہلے راونڈ میں ہی چینی تائپے کی لیانگ ٹنگ یو سے ہار کر مقابلے سے باہر ہوگئیں۔یو نے مالویکا کو 10-21، 21-15، 21-14 سے شکست دی۔ مالویکا نے پہلا گیم جیت کر اچھی شروعات کی لیکن وہ اگلے دو گیم ہار گئیں اور مقابلے سے باہر ہو گئیں۔
