اسلام آباد//پاکستان کرکٹ بورڈ (پی سی بی) اپنے لیجنڈ بلے باز محمد یوسف کو پاکستان کرکٹ ٹیم کا مستقل بیٹنگ کوچ مقرر کرنے کے لیے تیار ہے۔ ذرائع کا کہنا ہے کہ یہ فیصلہ لاہور کے نیشنل ہائی پرفارمنس سینٹر (این ایچ پی سی) میں بیٹنگ کوچ کے عہدے سے محمد یوسف کی ریٹائر منٹ کے بعد سامنے آیا ہے۔ ایسے میں واضح ہے کہ محمد یوسف جلد ہی مستقل طور پر پاکستانی ٹیم کے ساتھ نظر آئیں گے۔
این ایچ پی سی میں نئے بیٹنگ کوچ کے عہدے کا اعلان جلد کیا جائے گا۔ پاکستان کرکٹ بورڈ (پی سی بی) نے ابھی تک اس کی تصدیق نہیں کی۔ پاکستانی کرکٹ کی گورننگ باڈی نے سابق آسٹریلوی بلے باز میتھیو ہیڈن کو رواں سال کے آخر میں آسٹریلیا
میں ہونے والے ٹی ٹوئنٹی ورلڈ کپ کے لیے بیٹنگ کنسلٹنٹ مقرر کیا ہے تاہم وہ پاکستانی ٹیم کے ساتھ کام جاری نہیں رکھیں گے۔پاکستانی میڈیا کے مطابق ذرائع کا کہنا ہے کہ انہیں آسٹریلیا کے خلاف ہوم سیریز میں ہیڈ کوچ ثقلین مشتاق کی درخواست پر پاکستانی ٹیم کا عارضی بیٹنگ کوچ بنایا گیا تھا۔ یوسف اس وقت سری لنکا میں پاکستانی ٹیسٹ ٹیم کے ساتھ ہیں جہاں پاکستان ٹیم نے گال میں دو ٹیسٹ میچوں کی سیریز کے پہلے میچ میں میزبان ٹیم کو شکست دی تھی۔
