کٹھمانڈو۔ 16؍ جولائی۔ ایم این این۔ نیپال میں امریکہ کے نامزد سفیر ڈین آر تھامسن نے بدھ کے روز کہا کہ نیپالی اراکین پارلیمنٹ نے چین کی جانب سے ’غلط معلومات کی مہم‘ کے باوجود ملینیم چیلنج کارپوریشن ( ایم سی سی)کے معاہدے کی توثیق کی ہے۔بدھ کو سینیٹ کی خارجہ تعلقات کمیٹی کے سامنے اپنے ابتدائی بیان میں، تھامسن نے کہافروری میں، نیپال کی پارلیمنٹ نے عوامی جمہوریہ چین کی غلط معلومات پھیلانے کی مہم کے پیش نظر 500 ملین ملینیم چیلنج کارپوریشن کمپیکٹ کی توثیق کی۔یہ شاید پہلی بار ہوا ہے کہ کسی امریکی اہلکار نے فروری میں نیپالی پارلیمنٹ کی طرف سے اس کی توثیق تک500 ملین امریکی گرانٹ سے متعلق تنازعہ کے حوالے سے نیپال کے شمالی پڑوسی، چین پر نکتہ چینی کی ہے۔
نیپال نے ستمبر 2017 میں امریکہ کے ساتھ ایم سی سی معاہدے پر دستخط کیے تھے۔سینیٹ کی خارجہ تعلقات کمیٹی کے ایک بیان کے مطابق، تھامسن نے کہا، یہ منصوبہ نیپال کی صاف، وافر پن بجلی کو جنوبی ایشیا کے توانائی گرڈ سے جوڑنے کے لیے بجلی کی ترسیلی لائنیں بنائے گا۔ یہ نیپال میں اعلیٰ معیار کی سڑکیں بھی بنائے گا۔
یہ منصوبے ہمارے دونوں ممالک کی خوشحالی میں اضافہ کریں گے۔دستخط کے پانچ سال بعد، ایم سی سی کا معاہدہ نیپال میں سیاسی طور پر تقسیم کرنے والا مسئلہ بن گیا۔ ناقدین کے ساتھ ساتھ کمیونسٹ پارٹیوں کے ایک حصے نے اس کی پارلیمانی توثیق کی ضرورت پر سوالات اٹھائے اور کہا کہ اس کی کچھ دفعات سے نیپال کی خودمختاری کو نقصان پہنچے گا۔
