کولکاتا// صدر جمہوریہ کے عہدے کے لیے ووٹ ڈالنے کے بعد ریاستی اسمبلی میں میڈیا سے بات کرتے ہوئے وزیر اعلیٰ ممتا بنرجی کے بھتیجے ابھیشیک بنرجی نے ایک بار پھر بی جے پی پر سخت حملہ کیا ۔
انہوں نے کہا ہے کہ بھارتیہ جنتا پارٹی کی ریاستی اکائی کو بنگال میں اپنے ایم ایل اے کی تعداد کا بھی پتہ نہیں ہے۔صدارتی انتخاب سے ایک دن پہلے ایک فائیو اسٹار ہوٹل میں ٹھہرے ہوئے پارٹی کے ایم ایل اے پر ایک بار پھر طنز کرتے ہوئے انہوں نے کہا، ”آج بی جے پی ترنمول سے اس قدر خوفزدہ ہے کہ وہ اپنے ایم ایل اے کو ہوٹل میں یرغمال بناتی ہے، کیونکہ بی جے پی جانتی ہے کہ عوام ان کے ساتھ نہیں ہیں۔
ترنمول کانگریس کے 10 سے 12 ایم ایل اے بی جے پی کی حکومت والی ریاستوں میں ہیں لیکن ہم نے انہیں کبھی ہوٹلوں میں بند نہیں کیا۔ اس کی وجہ یہ ہے کہ لوگ ممتا بنرجی کے ساتھ کھڑے ہیں، اسی لیے بی جے پی بھی ڈرتی ہے۔ تمام مرکزی ایجنسیاں بشمول سی بی آئی اور ای ڈی ہمارے پیچھے لگ گئے لیکن آج تک وہ ہمیں ڈرا نہیں سکے۔ترنمول کانگریس کے قومی جنرل سکریٹری ابھیشیک نے کہا، بی جے پی خود نہیں جانتی ہے کہ بی جے پی کے پاس کتنے ایم ایل اے ہیں۔
پارٹی میں سے کچھ کہتے ہیں کہ 70 ایم ایل اے ہیں، کوئی کہتا ہے کہ 60 ہے، کوئی کہتا ہے 69، کچھ کہہ رہے ہیں 65۔ سچائی یہی ہے کہ بنگال کے لوگ بی جے پی کے ساتھ نہیں ہیں۔ابھیشیک بنرجی کے اس بیان پر بی جے پی نے بھی جوابی حملہ کیا ہے۔ قائد حزب اختلاف شبھیندو ادھیکاری نے کہا ہے کہ ترنمول کانگریس کے دو ممبران پارلیمنٹ نے کراس ووٹنگ کے ذریعہ دروپدی مرمو کو ووٹ دیا ہے۔ دوسری طرف ترنمول کا دعویٰ ہے کہ بی جے پی کے نو ایم ایل اے نے کراس ووٹنگ کی ہے۔
