کوہلی کے انگلینڈ کے خلاف دوسرے ون ڈے سے بھی باہر ہونے کا امکان ۔

نئی دہلی//ہندوستان کے سابق کپتان ویراٹ کوہلی جو کہ پیٹھ کی چوٹ کی وجہ سے منگل کو انگلینڈ کے خلاف پہلا ون ڈے نہیں کھیل سکے تھے، ان کے دوسرے ون ڈے سے بھی باہر ہونے کا امکان ہے۔ذرائع سے موصول ہونے والی معلومات کے مطابق ویراٹ ابھی کمر کی چوٹ سے ٹھیک نہیں ہوئے ہیں اور انگلینڈ کے خلاف جمعرات کو ہونے والے دوسرے ون ڈے کے لیے ان کے فٹ ہونے کا امکان نہیں ہے۔

منگل کو ہونے والے پہلے ون ڈے میں ویراٹ کی جگہ بلے باز شریاس ایر کو پلیئنگ الیون میں شامل کیا گیا تھا۔پہلے ون ڈے کی بات کریں تو اس میچ میں انگلینڈ کے بلے بازوں نے بھارتی فاسٹ باؤلنگ کے سامنے گھٹنے ٹیک دئے اور پوری ٹیم 25.2 اوورز میں 110 رنز پر ڈھیر ہو گئی۔ ہندوستانی فاسٹ بولر جسپریت بمراہ نے 7.2 اوور میں 3 میڈنز کے ساتھ 6/19 حاصل کیے، بمراہ کے علاوہ محمد شامی نے تین اور پرسدھ کرشنا نے ایک وکٹ حاصل کی۔ انگلینڈ کے ٹاپ چھ میں سے چار بلے باز کھاتہ بھی نہ کھول سکے۔ جواب میں روہت شرما (ناٹ آؤٹ 76) اور شیکھر دھون (31 ناٹ آؤٹ) کی عمدہ اننگز کی بدولت ہندوستان نے 18.4 اوورز میں 114 رنز بنا کر کامیابی حاصل کی۔ دونوں ٹیموں کے درمیان دوسرا ون ڈے جمعرات سے لارڈز میں کھیلا جائے گا۔