سرینگر//سی این آئی//کرگل وجے دیوس کے موقع پروزیر اعظم نریندر مودی نے فوجی اہلکاوں کو خراج تحسین پیش کرتے ہوئے ان کی قربانی کو یاد کیا ہے۔ سی این آئی مانیٹرنگ کے مطابق وزیر اعظم مودی نے ٹویٹ پیغام میں کہا ’’ہم ان (فوجیوں) کی قربانی کو یاد کرتے ہیں۔ ہم ان کی بہادری کو یاد کرتے ہیں۔ آج کرگل وجے دیوس پر ہم اپنے تمام شہدا کو خراج عقیدت پیش کر رہے ہیں، جنہوں نے ملک کی حفاظت کرتے ہوئے کرگل میں اپنی جانوں کے نذرانے پیش کئے۔
ان کی بہادری ہمیں ہر روز تحریک دیتی ہے۔ادھر، کرگل وجے دیوس سے ایک روز قبل شام کے وقت تولولنگ، ٹائیگر ہل اور دیگر مقامات پر ہونے والی جنگ کو یاد کیا گیا اور لداخ کے دراس علاقوہ میں قائم کرگل جنگ یادگاری پر 559 چراغ روشن کئے گئے۔ اس موقع پر اعلیٰ فوجی عہدیداران، فوجی اہلکار کے اہل خانہ اور دیگر افراد موجود رہے۔
دریں اثنا نائب صدر ایم وینکیا نائیڈو نے کرگل جنگ کے جانبازوںکو خراج عقیدت پیش کیا ہے۔ نائیڈو نے یہاں جاری ایک پیغام میں کہا کہ کرگل جانبازوں اور ان کے اہل خانہ کا ملک ہمیشہ احسان مند رہے گا۔ یہ بہادر جوان ہمیشہ یادوں میں رہیں گے۔ نائب صدر نائیڈو نے کہا کہ کارگل دیوس کے موقع پر میں پوری قوم کے ساتھ اپنی مسلح افواج کی ہمت اور بہادری کی داستانوں کو یاد کرتا ہوں۔ میں کارگل جنگ اور آپریشن وجئے کے بہادروں کو سلام پیش کرتا ہوں اور عظیم قربانی دینے والے جوانوں کو دل کی گہرائیوں سے خراج عقیدت پیش کرتا ہوں ‘‘۔
دریں اثناء کانگریس کے لیڈر راہل گاندھی نے کرگل وجئے دیوس کے موقع پر ملک کے لئے اپنی جانیں قربان کرنے والے فوجیوں کو خراج عقیدت پیش کیا۔ راہل گاندھی نے ٹویٹ کیا کہ ہمارے ترنگا کے وقار میں اپنی جان دینے والے جوان کو دل کی گہرائیوں سے خراج عقیدت۔ ملک کی سلامتی کے لئے آپ کی اور آپ کے اہل خانہ کی اس عظیم قربانی کو ہم ہمیشہ یاد رکھیں گے۔
