نائب وزیر اعلیٰ کا ڈِی ایچ پورہ کولگام کا دورہ

کولگام.انفو…نائب وزیر اعلیٰ سریندرکمار چودھری نے ڈِی ایچ پورہ کولگام کا دورہ کیا اور سابق سپیکرجموں و کشمیر قانون ساز اسمبلی اور سابق وزیر شہید ولی محمد اِیتو کو اُن کی 32ویں برسی کے موقعہ پر شاندار خراجِ عقیدت پیش کیا۔اُنہوں نے اِجتماع سے خطاب کرتے ہوئے شہید ولی محمد اِیتو کو ایک دُوراندیش سیاست داں اور عوامی سطح کا رہنما قرار دیا جنہوں نے اَپنی پوری زِندگی لوگوں بالخصوص پسماندہ اور دیہی کمیونٹیوں سے تعلق رکھنے والوں کی فلاح و بہبود اور ترقی کے لئے وقف کر دی۔ اُنہوں نے کہا کہ مرحوم رہنما کی ہمہ گیر ترقی، فرقہ وارانہ ہم آہنگی اور جمہوری اَقدار کے لئے لگن آج بھی موجودہ اور آنے والی نسلوں کے لئے مشعلِ راہ ہے۔نائب وزیراعلیٰ نے کہاکہ شہید ولی محمد اِیتو نے جمہوری اِداروں کو مضبوط بنانے اور عوام کے ساتھ قریبی رابطہ برقرار رکھتے ہوئے ان کے مسائل کے مو¿ثر حل میں کلیدی کردار اَدا کیا۔ اُنہوں نے مزید کہا کہ حکومت مرحوم رہنما کے عوام دوست طرزِ حکمرانی اور مساوی ترقی کے ویژن کو آگے بڑھانے کے لئے پُرعزم ہے۔اِس موقعہ پر وزیر برائے صحت و طبی تعلیم ، سماجی بہبود اور تعلیم سکینہ اِیتو نے بھی خطاب کرتے ہوئے مرحوم رہنما کو زبردست خراجِ عقیدت پیش کیا اور خطے کی سماجی و اِقتصادی ترقی میں اُن کی گرانقدر خدمات کو یاد کیا۔اُنہوں نے کہا کہ شہید ولی محمد اِیتو نے اَپنی زندگی تعلیم، سماجی اِنصاف اور جوابدہ طرزِ حکمرانی کے ذریعے لوگوں کو بااِختیار بنانے کے لئے وقف کر دی۔وزیر برائے امورِ نوجوانان و کھیل کود ستیش شرما، وزیراعلیٰ کے مشیر ناصر اسلم وانی اور دیگر اراکین اسمبلی نے بھی اِس موقعہ پرخطاب کیا اور مرحوم رہنما کو زبردست خراجِ عقیدت پیش کیا۔اِس موقعہ پر رُکن اسمبلی پانپور جسٹس ( ر) حسنین مسعودی ، ممبر اسمبلی گلمرگ پیرزادہ فاروق احمد شاہ، رُکن قانون ساز اسمبلی اننت ناگ ویسٹ عبدالمجید لارمی ،ممبر قانون ساز اسمبلی اننت ناگ ایسٹ۔شانگس ریاض احمد خان، رُکن اسمبلی دیوسر پیرزادہ فیروز احمد، ممبر قانون ساز اسمبلی زینہ پورہ شوکت حسین گنائی ،ممبر اسمبلی راجپورہ غلام محی الدین میر، ممبر قانون ساز اسمبلی اُوڑی ڈاکٹر سجاد شفیع،ممبر اسمبلی کوکر ناگ ظفر علی کھٹانہ، ضلعی اِنتظامیہ کے سینئر اَفسران اور بڑی تعداد میں مقامی لوگ بھی موجود تھے۔