نئی دلی// مرکزی وزیر داخلہ اور تعاون امیت شاہ نے جمعہ کو ہم وطنوں سے آزادی کا امرت مہوتسو کے دوران اپنے گھروں سے ترنگا لہرا کر وزیر اعظم نریندر مودی کی طرف سے شروع کی گئی ‘ہر گھر ترنگا مہم میں شامل ہونے کی اپیل کی۔ شاہ نے شہریوں سے اپیل کی کہ وہ 13 سے 15 اگست تک اپنے گھروں پر ترنگا لہرائیں۔
شاہ نے یہ اپیل سلسلہ وار ٹویٹس کے ذریعے کی اور کہا، ’’ہمارا قومی پرچم نہ صرف ہر ہندوستانی کو متحد کرتا ہے بلکہ قوم کے تئیں ان کی عقیدت کے جذبے کو بھی مضبوط کرتا ہے۔ 22 جولائی 1947 کو قومی پرچم کے طور پر ترنگے کی موجودہ شکل اختیار کرنے کا اعلان کیا گیا تھا۔ وزیر داخلہ نے مزید کہا کہ وزیر اعظم نے آزادی کا امرت مہوتسو کے دوران ‘ہر گھر ترنگا مہم کا آغاز کیا۔ اس مہم کے ساتھ، شاہ نے کہا، ملک بھر میں تقریباً 20 کروڑ گھروں میں ترنگا لہرایا جائے گا، جو شہریوں بالخصوص نوجوانوں میں حب الوطنی کے شعلے کو مزید روشن کرنے کا کام کرے گا۔
شاہ نے کہا کہ میں سبھی سے اپیل کرتا ہوں کہ وہ 13 سے 15 اگست تک اپنے گھروں پر ترنگا لہرا کر اس مہم میں شامل ہوں، ایسا کرنے سے ہم نوجوانوں میں ترنگے کے تئیں احترام اور لگاؤ بڑھانے کے ساتھ ساتھ انہیں قربانیوں کے بارے میں بھی آگاہ کر سکیں گے۔ اس سے پہلے دن میں، ہر گھر ترنگا تحریک کو مضبوط بنانے کے لیے، پی ایم مودی نے لوگوں سے 13 اور 15 اگست کے درمیان گھروں میں ترنگا لہرانے یالگانے کرنے کی اپیل کی اور کہا کہ یہ تحریک قومی پرچم سے ہمارا تعلق گہرا کرے گی۔
