ہنر خوشحالی اور مواقع کا پاسپورٹ ہیں /مرکزی وزیر مملکت راجیو چندر شیکھر
نوجوانوں کوایسی مہارتیں حاصل کرنی چاہئیں جو عالمی مہارت کے تقاضوں کے مطابق ہوں ۔ مرکزی وزیر مملکت
رام بن 7 نومبر /مرکزی وزیرمملکت سکل ڈیولپمنٹ، انٹر پرنیور شپ اور الیکٹرانکس و آئی ٹی راجیو چندر شیکھر نے کہا کہ نوجوانوں کو روز گار اور انٹر پرنیور شپ کے مواقع کیلئے بدلتے وقت کے مطابق خود کو ہنر سے آراستہ کرنا چاہئے ۔ وزیر مملکت نے رام بن ضلع کے چندر کوٹ کے گورنمنٹ پولی ٹیکنک کالج میں طلباءاور عملے کے ارکان سے خطاب کرتے ہوئے کہا ہنر خوشحالی اور مواقع کا پاسپورٹ ہیں ۔ تعلیم کے ساتھ ساتھ مستقبل سے متعلقہ ہنر کا ہونا بھی ضروری ہے تا کہ جاب مارکیٹ یا انٹر پرنیور شپ کے شعبوں میں مسابقتی رہنا آسان ہو ۔ مرکزی وزیر مملکت نے کہا کہ یہ وزیر اعظم جناب نریندر مودی کا وژن تھا کہ ہنر مندی کے مواقع سب کیلئے دستیاب ہونے چاہئیں ۔ چندر شیکھر نے کہا کہ حکومت اب طلباء/نوجوان کاروباریوں کیلئے قلیل مدتی اور طویل مدتی 5000 ہنر پروگرام پیش کر رہی ہے ۔ انہوں نے مزید کہا کہ نصاب میں تبدیلی کی گئی ہے اور نئے مستقبل کے کورسز شامل کئے گئے ہیں کیونکہ آنے والے دنوں میں تیزی سے بدلتے ہوئے تکنیکی ماحول کے ساتھ مہارت کے تقاضے بدل جائیں گے ۔ بعد میں چندر شیکھر نے رام بن میں جاب فئیر کا افتتاح کیا جس میں انہوں نے ملازمت کے متلاشیوں اور بھرتی کرنے والوں دونوں سے بات چیت کی جو وہاں موجود تھے ۔ انہوں نے اہل امیدواروں میں آفر لیٹر اور تربیت کی تکمیل کے سرٹیفکیٹ بھی تقسیم کئے ۔ انہوں نے کہا کہ ملازمتیں دستیاب مواقع کے بارے میں اہم فیصلہ کن ہیں ۔ ہم اس بات کو یقینی بنائیں گے کہ یہا چھ مہینوں میں منعقد ہونے والا اگلا جاب فئیر تین گنا بڑا ہو گا جس میں مزید کئی کمپنیاں حصہ لیں گی ۔ اس کے علاوہ ہم پبلک سیکٹر یونٹس سے درخواست کریں گے کہ وہ مقامی طور پر دستیاب ہنر مند ٹیلنٹ کو لازمی طور پر جذب کریں ۔ اس کے بعد وزیر نے رام بن ضلع کے اسکل ڈیولپمنٹ منصوبوں کا جائزہ لیا جس کے بارے میں انہیں رام بن کے ضلع ترقیاتی کمشنر مسرت الاسلام نے تفصیلی پرزنٹیشن دی ۔ چندر شیکھر نے اَفسران کے ساتھ مقامی طور پر دستیاب مواقع سے ہنر مندی کے ماحولیاتی نظام کو بہتر بنانے کے طریقوں پر تبادلہ خیال کیا ۔ مرکزی وزیرمملکت موصوف نے رام بن میں ایک تقریب میں خصوصی طور پر معذور مستحقین میں موٹر سائیکل اور سکوٹی کی چابیاں بھی تقسیم کیں ۔ تقریب میں مرکزی وزیر مملکت نے ممکن اور تیجسوینی سکیموںکے استفادہ کنندگان کو گاڑیوں کی چابیاں بھی دی۔اِس سے قبل مرکزی وزیر مملکت آج صبح جموں پہنچے جہاں حکومت اور سکل ڈیولپمنٹ ڈیپارٹمنٹ کے افسران کے ایک گروپ نے ان کا استقبال کیا جن میں ڈائریکٹر سکل ڈیولپمنٹ اور ریجنل ڈائریکٹر آر ڈی ایس ڈی ای شامل تھے ۔
