لیفٹنٹ گورنر نے ریاسی کے پونی میں امر جوان شوریہ استھل کا کیا افتتاح
ریاسی انفو لیفٹنٹ گورنر منوج سنہا نے پونی ریاسی میں امر جوان شوریہ استھل کا افتتاح کیا اور پرم پوجیہ سنت بالک یوگیشور داس جی مہاراج کو خراج تحسین پیش کیا ۔ لیفٹنٹ گورنر نے ویر ستمب پر پھول چڑھائے اور شہداءکو خراجِ عقیدت پیش کرنے کے بعد کہا ” ویر ناریس ، ہمارے سابق فوجیوں کو سلام اور ان تمام شہداءکو خراجِ عقیدت پیش کیا جنہوں نے ہمارے ملک کیلئے اپنی جانیں قربان کی ہیں “۔ لیفٹنٹ گورنر نے کہا کہ اگست 2019 میں آرٹیکل 370 کی منسوخی کے بعد دہشت گردی کو پروان چڑھانے والے ماحولیاتی نظام کو ختم کر دیا گیا ہے ۔ انہوں نے مزید کہا کہ قومی سلامتی کے تحفظ کیلئے قوم حقیقی معنوں میں بہادر جوانوں کی مقروض ہے ۔ اس موقع پر لیفٹنٹ گورنر نے انتظامیہ کی ترجیحات پر روشنی ڈالی ۔ لیفٹنٹ گورنر نے کہا ” ہمہ جہت اقتصادی ترقی ہمارے لئے بنیادی اہمیت کی حامل ہے تا کہ ہر شہری امن کے ماحول میں عزت اور وقار کی زندگی گزار سکے ۔ دیہی بنیادی ڈھانچے میں نئی تحرک کے نتیجے میں لوگوں کیلئے بہت زیادہ خوشحالی آئے گی ۔ “ انہوں نے مزید کہا کہ جموں و کشمیر نے پچھلے تین برسوں میں بہت آگے کا سفر طے کیا ہے ۔ انہوں نے کہا کہ ہم نے ترقی کے پہیے کو رواں دواں رکھا ہے تا کہ اس بات کو یقینی بنایا جا سکے کہ معاشرے کا کوئی بھی طبقہ پیچھے نہ رہ جائے ، اس بات کو یقینی بنانے کیلئے کہ ترقی کے پسماندہ گروہوں کو فائدہ پہنچے اور اس بات کو یقینی بنایا جائے کہ خوشحالی نوجوانوں کیلئے روشن مستقبل لائے ۔ “ لیفٹنٹ گورنر نے کہا کہ دیہی معیشت کی بحالی کیلئے ہماری کوششوں کے نتائج واضح طور پر نظر آ رہے ہیں ، کسانوں کو بہتر قیمتیں مل رہی ہیں ، کمزور طبقے کیلئے سماجی تحفظ کے جال کو یقینی بنانے کیلئے بہت سی اسکیمیں لاگو کی گئی ہیں اور پی آر آئی کو دیہی ترقی کو آگے بڑھانے کیلئے بااختیار بنایا گیا ہے ۔ لیفٹنٹ گورنر نے کہا کہ جموں کشمیر کے ترقیاتی منصوبوں کی تکمیل کی تیز رفتاری ، بہتر انفراسٹرکچر کی تخلیق ، عوامی خدمات کی فراہمی کے طریقہ کار کو ہموار کرنا ، تعلیمی اور صحت کی بہتر سہولیات اور بڑے پیمانے پر سرمایہ کاری کی تجاویز کے ساتھ بڑھتے ہوئے صنعتی شعبے نے شاندار مستقبل کی مضبوط بنیاد رکھی ہے ۔ لیفٹنٹ گورنر نے کہا کہ بیک ٹو ولیج IV پروگرام کے دوران ہر پنچایت سے 15 نوجوانوں کو خود روز گار پیدا کرنے میں مدد کیلئے شناخت کرنے کی کوشش کی گئی ، 27000 منظوری کے خطوط جاری کئے گئے ہیں اور دسمبر کے آخر تک تمام منظوری کے خطوط جاری کر دئیے جائیں گے ۔ انہوں نے کہا کہ ہم نے عوامی خدمات کی فراہمی کو بہتر بنایا ہے اور ضلع کی ترقی کیلئے زیادہ مالی اخراجات کو یقینی بنایا ہے ۔ انہوں نے مزید کہا کہ جامع اور اعلیٰ اقتصادی ترقی کیلئے ہماری حکمت عملی کے حصے کے طور پر صحت ، تعلیم ، صنعت ، زراعت ، دستکاری پر خصوصی توجہ دی جا رہی ہے ۔ ریاسی ضلع میں ترقیاتی منظر نامے پر بات کرتے ہوئے لیفٹنٹ گورنر نے بتایا کہ گذشتہ مالی سال میں ضلع کیپیکس اسکیم کے تحت ریاسی میں 1012 پروجیکٹ مکمل کئے گئے تھے جبکہ اس سال کا ہدف 1500 سے زیادہ پروجیکٹوں کو مکمل کرنے کا ہے ۔ انہوں نے مزید کہا کہ گذشتہ سال ڈسٹرکٹ کیپیکس کے تحت ریاسی ضلع کو ترقیاتی کاموں کیلئے 1125 کروڑ روپے مختص کئے گئے تھے اور اس سال یہ رقم بڑھا کر 1183 کروڑ روپے کر دی گئی ہے ۔ پرم پوجیہ سنت شری بالک یوگیشور داس جی مہاراج نے اپنے خطاب میں پونی کو تیرتھ استھل کے طور پر ترقی دینے کے وژن کو شئیر کیا ۔ انہوں نے شہیدوں کے خاندانوں کی فلاح و بہبود کیلئے اتی وشنو مہا یگیہ سمیتی کی سرگرمیوں پر بھی روشنی ڈالی ۔ قبل ازیں لفٹینٹ گورنر نے پرم ویر چکر ایوارڈ یافتہ کیپٹن وکرم بترا کے والدین، ملک کی سلامتی کیلئے اپنی جانیں قربان کرنے والے فوجیوں کے اہل خانہ اور ویر ناریس کو اعزاز سے نوازا ۔ لفٹینٹ گورنر نے یگیہ شالہ کا افتتاح بھی کیا اور شہید فوجیوں کے اہل خانہ کی فلاح و بہبود کیلئے بے لوث خدمات انجام دینے والے سابق فوجیوں اور تنظیموں کو مبارکباد دی ۔ مختلف قومی انضمام کے مقابلوں اور ریلیوں میں حصہ لینے والے طلباءکو بھی مبارکباد دی گئی ۔ پرم پوجیہ سنت شری بالک یوگیشور داس جی مہاراج پر ایک اشاعت بھی جاری کی گئی ۔ اس موقع پر برگیڈئیر ہرچرن سنگھ ، پی آر آئی اراکین ، سابق فوجی ، شہداءکے اہل خانہ ، ویر ناریس ، اتی وشنو مہایگیہ سمتی کے عہدیداران اور زندگی کے تمام شعبوں سے تعلق رکھنے والے ممتاز شہری موجود تھے ۔ اے ڈی جی پی جموں ، ڈویژنل کمشنر جموں ، ڈپٹی کمشنر ریاسی ، پولیس ، دفاع اور سول انتظامیہ کے اعلیٰ حکام بھی موجود تھے ۔
