غلام حسن میر نے جموں میں اپنی پارٹی عوامی رابطہ پروگرام کا لیا جائزہ
جموں/16اگست/اپنی پارٹی سنیئر نائب صدر غلام حسن میر نے پارٹی کیڈر کو ہدایت کی ہے کہ وہ جمون وکشمیر میں آنے الے بلدیاتی اور پنچایتی راج اداروں کے انتخابات کے لئے تیار ہوجائیں۔ موصولہ پریس بیان کے مطابق غلام حسن میر نے بدھ کے روز پارٹی دفتر گاندھی نگر میں ایک اعلیٰ سطحی اجلاس کی صدارت کی جس میں جموں کی پارٹی قیادت، ذیلی تنظیموں کے سربراہان، ضلع صدور اور مختلف ونگوں کے انچارج نے شرکت کی۔ انہوں نے آنے والے بلدیاتی اور پنچایتی راج اداروں کے انتخابات کے حوالے سے پارٹی کی تیاریوں کا جائزہ لیا۔انہوں نے کہاکہ عوامی رابطہ مہم میں تیزی لائی جائے اور عوام کو اپنی پارٹی کی پالیسی اور یکساں ترقیاتی ایجنڈے سے متعلق آگاہ کریں۔ انہوں نے جموں وکشمیر میں جمہوری نظام کی بحالی میں غیر ضروری تاخیر پر بھی گہری تشویش کا اظہار کرتے ہوئے کہاکہ اِس سے حکومت اور عوام کے درمیان دوریاں بڑھی ہیں، لوگ خود کو انتظامیہ سے الگ تھلگ محسوس کر رہے ہیں۔غلام حسن میر نے کہا”منتخب حکومت لوگوں کے سامنے جوابد ہ ہوتی ہے، لہٰذا موجودہ انتظایہ کی بجائے منتخب حکومت کو لایاجوکہ حکومت میں شفافیت اور جوابدہی لانے کے لئے ذمہ دار ہوسکتی ہے“۔ انہوں نے کہاکہ اپنی پارٹی اِس بات پر یقین رکھتی ہے کہ جموں وکشمیر میں لوگوں کے معیار ِ حیات کو بہتر بنانے کے لئے قدرتی وسائل کا پائیدار استعمال کیاجانا چاہئے۔ دریں اثناءانہوں نے علاقائی اور مذہبی تقسیم کی سیاست کوتنقید کا نشانہ بناتے ہوئے پارٹی کیڈر سے کہاکہ وہ دونوں خطوں کی یکساں ترقی اور اتحاد کے لئے کام کریں۔انہوں نے کہا”اپنی پارٹی میں نفرت، علاقائی یامذہبی تقسیم کے لئے کوئی جگہ نہیں، لوگ پہلے ہی روایتی سیاسی جماعتوںکی تفرقہ انگیز سیاست کی وجہ سے مشکلات ومصائب کا شکار رہے ہیں، ہمیں آگے آکر جموں وکشمیر کی عوام اور سبھی خطوں کے اتحاد کے لئے کام کرنا ہوگا۔ انہوں نے اس بات پرزور دیاکہ زمینی سطح کے ورکروں کا لوگوں میں بھائی چارہ اور اتحاد کو فروغ دینے میں انتہائی اہم کردار ہے۔ اس اجلاس میں موجود سینئر لیڈران میں ریاستی جنرل سیکریٹری وجے بکایہ، صوبائی صد رجموں سردار منجیت سنگھ، سنیئر صوبائی نائب صدر فقیر ناتھ، ضلع صدور وغیرہ قابل ِ ذکر ہیں۔
