سری نگر میں فارمولا کار رن کا انعقاد کیا جائے گا :صوبائی کمشنر کشمیر نے انتظامات کا جائزہ لیا

سری نگر….انفو…………….سری نگر میں للت گھاٹ سے نہرو پارک تک چلنے والی فارمولا فور کار کا پہلا شاندار مظاہرہ اتوار کو منعقد کیا جائے گا جس میں معروف فارمولا ڈرائیور شائقین کو محظوظ کریں گے۔یہ بلیوارڈ روڈ پر دیکھنے کے لئے ایک سنسنی خیز شو ہوگا جبکہ ڈرائیور صبح 10بجے سے دوپہر 2بجے تک 1.7 کلومیٹر کے فاصلے پر ریس اور سٹنٹ میں مشغول ہوں گے۔اِس سلسلے میںصوبائی کمشنرکشمیر وِجے کمار بدھوری نے آج ایک میٹنگ کی صدارت کی تاکہ اِس تقریب کے کامیاب اِنعقاد کے اِنتظامات کو یقینی بنایا جاسکے۔صوبائی کمشنر کشمیر نے میٹنگ سے خطاب کرتے ہوئے کہا کہ یہ اَپنی نوعیت کا پہلا ایونٹ نوجوانوں کے لئے ایک بڑی کشش کا باعث بنے گا اور ان میں فارمولا فور کھیل کے لئے جذبہ پیدا کرے گا۔اُنہوں نے سری نگر میں فارمولا فور کار ریس کی میزبانی کو ایک بڑی کامیابی قرار دیتے ہوئے کہا کہ یہ موقعہ کشمیر کے کھیلوں سے محبت کرنے والوں کے لئے آپشنز کا راستہ کھول دے گا اور وادی ¿کے شائقین کے لئے کیریئر کے ایک نئے آپشن کا آغاز ہوگا۔صوبائی کمشنر کشمیر نے کہا کہ یہ ”ایڈرینالائن رَشنگ“کار ریس لوگوں کے لئے بہت دِلچسپ اور دِلفریب ہو گی اور اُنہوں نے مزید کہا کہ اس طرح کے شوز کشمیر کی ایڈونچر ٹورازم کو بھی فائدہ پہنچائیں گے۔اُنہوں نے اِنتظامات کا جائزہ لیتے ہوئے متعلقہ اَفسران کو ہدایت دی کہ وہ مذکورہ سڑک کی سطح کو یقینی بنائیں اور گڑھوں کو بلیک ٹاپ کرنے کو یقینی بنایا جائے ۔اُنہوں نے ڈرائیوروں کی حفاظت کو یقینی بنانے کے لئے راستے کے دونوں سروں پر سرخ بیریکیڈز سمیت سی ٹائپ 2-ٹیئر بیریکیڈز کی تنصیب کی ہدایت دی۔ اِس کے علاوہ دو اہم نگہداشت ایمبولینسوں اور آگ بجھانے والے آلات کے ساتھ ایک میڈیکل ٹیم کی تعیناتی کی بھی ہدایت دی۔مزید برآں،صوبائی کمشنرنے ایونٹ کے لئے مناسب حفاظتی انتظامات اور ڈرون کی اجازت سمیت ایونٹ مینجمنٹ کے لئے دیگر ضروریات کی بھی ہدایت دی۔میٹنگ میں وائس چانسلر ایل سی ایم اے کے وائس چانسلر، ڈائریکٹر سیاحت ،جوائنٹ کمشنر ایس ایم سی، پی ڈبلیو ڈی، محکمہ صحت، ٹریفک، پولیس، فائر اینڈ ایمرجنسی کے افسران اور ریسنگ پروموشنز پرائیویٹ لمیٹڈ کے نمائندوں نے شرکت کی۔