لیفٹیننٹ گورنر نے بی ایس ایف کی’ پیدل فار ایک بھارت ،شریشٹھ بھارت‘ریلی کے 79 سائیکل سواروں کو 79 ویں یوم آزادی کی تقریبات کے موقعہ پر مُبارک باد دی

سری نگر…انفو…لیفٹیننٹ گورنر منوج سِنہا نے بارڈر سیکورٹی فورس کی جانب سے منعقدہ ’پیڈل فار ایک بھارت، شریشٹھ بھارت‘ ریلی میں شرکت کرنے والے 79 سائیکلسٹوں کو مُبارک باد پیش کی۔ یہ سائیکل ریلی 79ویں یومِ آزادی کی تقریبات کے سلسلے میں منعقد کی گئی تھی۔ریلی میں شامل 79 سائیکل سواروں میں 40 مقامی نوجوان اور 39 بی ایس ایف اہلکار شامل تھے۔ اُنہوں نے79 کلومیٹر ’ بی ایس ایف کیمپس بانڈی پورہ ۔ مانسبل ۔سنبل – شالہ ٹینگ ۔ حیدرپورہ ۔بخشی سٹیڈیم ۔ فرنٹیئر ہیڈکوارٹر بی ایس ایف کشمیر ہمہامہ ‘کا فاصلہ طے کیا ۔ اِس ریلی نے ہندوستان کی ثقافتی تنوع، قومی یکجہتی اور مشترکہ شناخت کے جذبے کو اُجاگر کیا۔لیفٹیننٹ گورنر نے ملک کی پہلی لائن آف ڈیفنس بی ایس ایف کو اُن بہادر سپاہیوں اور اَفسروں کو خراج تحسین پیش کرنے پر مُبارک باد دی جنہوں نے قوم کے اتحاد اور سا لمیت کے لئے بے مثال بہادری اور قربانی کا مظاہرہ کیاہے اُنہوں نے کہا کہ یہ ریلی نوجوانوں کو بی ایس ایف، فوج اور پولیس فورس میںشامل ہونے کی ترغیب دے گی۔اُنہوںنے کہا،”بی ایس ایف کی یہ ریلی جو کئی قصبوں اور دیہاتوں سے گزری، نوجوانوں کے لئے ایک تحریک ثابت ہوئی اور انہیں ہمارے بانیانِ وطن کے ویژن اور اُن کی بے لوث خدمت کے اصولوں کی یاد دلائی۔ جموں و کشمیر کے ہر شہری کا فرض ہے کہ وہ اس راستے پر گامزن ہو اور جموں کشمیر کی تعمیر کے لئے اَپنے خوابوں کو پورا کرے۔“منو ج سِنہا نے مزید کہا کہ تمام سائیکل سوار ہندوستان کی بہادری کی دیرینہ روایت کی جیتی جاگتی علامت ہیں۔ اُنہوں نے کہا کہ 79 کلومیٹر کا یہ فاصلہ ہندوستان کی آزادی کے 79 برس اور ان برسوں کی جدوجہد کی نمائندگی کرتا ہے، اور ہر سائیکل سوار معاشرے کی اصل طاقت کا مظہر ہے جیسے ہر سپاہی قوم کی طاقت کا نمائندہ ہے۔اُنہوں نے کہا،”کشمیر سے کنیا کماری تک ہندوستان ایک ہے۔ 140 کروڑ بھارتیوں کا دل و جان متحد ہیں اور ہم سب ایک کنبہ کی مانند ہیں۔ اِس جذبے اور بندھن کو ہمارے اتحاد کو مضبوط کرنا چاہیے، ہمیں ’ نیشن فرسٹ‘کے جذبے کو اَپنانا چاہیے اور ہر شہری کو ذاتی مفادات سے بالاتر ہو کر قوم کی تعمیر کو ترجیح دینی چاہیے۔“لیفٹیننٹ گورنر نے نوجوانوں اور معاشرے کے تمام طبقات سے خود احتسابی کی اپیل کی اور ’وِکست جموں کشمیر‘ اور ’وِکست بھارت‘ کے مقصد کے لئے خود کو وقف کرنے کا عزم لینے کی تلقین کی۔اُنہوں نے معاشرے پر زور دیا کہ وہ ان عناصر کے خلاف ہوشیار اور چوکس رہیںجو امن اور سماجی ہم آہنگی کو نقصان پہنچانے کی کوشش کر رہے ہیں۔ اُنہوں نے باخبر شہریوں اور سول سوسائٹی سے ’ہر گھر ترنگا‘ مہم میں بھرپور شرکت کرنے اور ہر کنبے کو اس مہا یگیہ (قومی مہم) کا حصہ بننے کی ترغیب دینے کی اپیل کی۔اِس موقعہ پر لیفٹیننٹ گورنر نے پہلگام میں پاکستان کی سرپرستی میں ہوئے دہشت گردانہ حملے میں شہید ہوئے عام شہریوں کوبھی خراجِ عقیدت پیش کیا۔اُنہوں نے کہا کہ آپریشن مہادیو اور آپریشن سندور کے ذریعے ہم نے پاکستان کی بربریت کا بدلہ لیا ہے۔ اگر دہشت گرد ملک پاکستان ہمارے شہریوں کا خون بہائے گا تو اسے اس کی بھاری قیمت چکانی پڑے گی۔“تقریب میں آئی جی بی ایس ایف کشمیر فرنٹیئر اشوک یادو، آئی جی ایس ٹی سی بی ایس ایف کشمیر سولومن یش کمار مِنز، ضلع ترقیاتی کمشنربڈگام ڈاکٹر بلال محی الدین بٹ، ایس ایس پی بڈگام نکھل بورکر، بی ایس ایف، سول و پولیس انتظامیہ کے دیگر اعلیٰ افسران، سائیکل سوار اور بڑی تعداد میں نوجوان موجود تھے۔