سرینگر /09ستمبر / سی این آئی /آر ایس ایس اور بی جے پی میں مضبوطی سے جڑیں رکھنے والے چندرپورم پونوسامی رادھا کرشنن کو ملک کے 15 ویں نائب صدر کے طور پر منتخب کیا گیا۔ ادھر وزیر اعظم نریندر مودی اور وزیر داخلہ امیت شاہ نے انہیں مبارک باد پیش کی ہے ۔ سی این آئی کے مطابق ملک کے نائب صدر عہدے کیلئے انتخابات مکمل ہوئے جس دوران این ڈی اے امید وار رادھا کرشنن کو اپوزیشن کے مشترکہ امیدوار جسٹس بی سدرشن ریڈی کو شکست دے کر نائب صدر ہند کے طور پر منتخب کیا گیا ہے۔انتخابی ریٹرننگ آفیسر کے مطابق رادھا کرشنن نے 452 پہلی ترجیحی ووٹ حاصل کیے، جبکہ ریڈی 300 میں کامیاب ہوئے۔ خیال رہے کہ منگل کو اس عہدے کیلئے انتخابات ہوئے اور شام کو گنتی ختم ہونے کے فوراً بعد نتائج کا اعلان کیا گیا۔67 سالہ رادھا کرشنن جگدیپ دھنکر کی جگہ لے رہے ہیں، جنہوں نے 21 جولائی کو نائب صدر کے عہدے سے استعفیٰ دے کر سب کو حیران کر دیا۔انہوں نے 31 جولائی 2024 کو مہاراشٹر کے گورنر کے طور پر حلف لیا تھا۔ اس سے پہلے انہوں نے تقریباً ڈیڑھ سال تک جھارکھنڈ کے گورنر کے طور پر خدمات انجام دیں۔ادھر وزیر اعظم نریندر مودی ،وزیر داخلہ امیت شاہ سمیت دیگر سیاسی لیڈران نے انہیں مبارک باد دی ہے ۔ امیت شاہ نے ایک ایکس پوسٹ میں لکھا ”مجھے پختہ یقین ہے کہ معاشرے کی نچلی سطح سے اٹھنے والے لیڈر کی حیثیت سے آپ کی سمجھداری اور انتظامیہ کے بارے میں گہرا علم ہماری پارلیمانی جمہوریت میں پسماندہ لوگوں کی خدمت کے لیے بہترین کام کرنے میں ہماری مدد کرے گا“۔انہوں نے مزید لکھا کہ ایوان بالا کے تقدس کے نگہبان کے طور پر آپ کے سفر کے لیے میں آپ کو نیک خواہشات پیش کرتا ہوں۔
سی پی رادھا کرشنن 15ویں نائب صدر منتخب
