سرینگر////21نومبر//// سی این آئی///// لیفٹنٹ گورنر منوج سنہا نے سرحدی باشندوں کی بحالی کے ایک بڑے اقدام کا اعلان کرتے ہوئے پونچھ ضلع میں پاکستانی گولہ باری سے متاثرہ خاندانوں کیلئے 133 نئے مکانات کی تعمیر کی تصدیق کی۔سی این آئی کے مطابق لیفٹنٹ گورنر منوج سنہا نے پونچھ کا دورہ کیا جس دوران انہوں نے اعلان کیا کہ سرحد پار گولہ باری سے متاثرہ 133 نئے مکانات ہر ایک کی 10 لاکھ روپے سے دوبارہ تعمیر کیے جائیں گے۔ دورے کے دوران لیفٹنٹ گورنر منوج سنہا نے کہا کہ انتظامیہ مسلسل ان لوگوں کے ساتھ کھڑی ہے جنہیں سرحد پار سے گولہ باری سے نقصان پہنچا ہے۔انہوں نے کہا کہ 14 شدید متاثرہ خاندانوں میں سے 13 خاندانوں کو مرکزی وزیر داخلہ کے دورہ کے دوران پہلے ہی سرکاری ملازمتیں فراہم کی جا چکی ہیں، جبکہ ایک بچے کو مستقبل میں مدد کیلئے یقین دہانی کا خط جاری کیا گیا ہے۔سنہا نے کہا کہ اگرچہ ایس ڈی آر ایف ریلیف اور مرکزی مالی امداد پہلے فراہم کی گئی تھی جس میں تباہ شدہ مکانات کیلئے 2 لاکھ اور 1 لاکھ روپے شامل تھے، جو انہوں نے کہا کہ مکمل تعمیر نو کے لیے ناکافی ہے۔انہوں نے کہا کہ ہیومن ریسورس ڈیولپمنٹ سوسائٹی ایک معروف سماجی خدمت تنظیم نے متاثرین کیلئے محفوظ اور باوقار زندگی کو یقینی بنانے کے لیے تقریباً 10 لاکھ روپے کی لاگت سے 133 مستقل مکانات کی تعمیر کے لیے قدم اٹھایا ہے۔منوج سنہا نے کہا ” جیسا کہ آپ دیکھ سکتے ہیں، کام چھ ماہ کے اندر مکمل ہو گیا ہے۔ یہ بروقت، محفوظ اور ہمدردانہ بحالی ہے ۔ “ دورے کے دوران، جموں و کشمیر کے پولیس سربراہ نلین پربھات اور آئی جی پی کشمیر سمیت سینئر حکام نے منوج سنہا کے ساتھ مل کر خطے کی مجموعی سیکورٹی صورتحال کا جائزہ لیا۔حکام نے آپریشن سندور کے دوران متاثر ہونے والے شہریوں میں امدادی سامان بھی تقسیم کیا۔اس بات کی یقین دہانی کرائی کہ تمام تباہ شدہ رہائشی ڈھانچوں کو بغیر کسی تاخیر کے دوبارہ تعمیر کیا جائے گا۔
سرحد پار گولہ باری سے متاثرین کیلئے 133 نئے مکانات دوبارہ تعمیر کرنے کا اعلان
