راہی کے نظریات ہندوستان کے ترقی پسند معاشرے کےلئے ایک پوشیدہ بنیادی ڈھانچہ: لیفٹیننٹ گورنرمنوج سنہا

سری نگر….یکم نومبر…جے کے این ایس ….لیفٹیننٹ گورنر منوج سنہا نے ہفتہ کو کہا کہ ڈاکٹر راہی معصوم رضا نے نسلوں کو خواب دیکھنے اور اپنی صلاحیتوں پر یقین کرنے کی ترغیب دی۔ جے کے این ایس کے مطابق کشمیر یونیورسٹی میں راہی معصوم رضاکی میراث پر 3روزہ بین الاقوامی سیمینار کے افتتاحی سیشن سے خطاب کرتے ہوئے لیفٹیننٹ گورنر منوج سنہا نے کہا کہ راہی معصوم رضا کا سب سے بڑا تحفہ خود شناسی کا پیغام اور مقصد کے ساتھ زندگی گزارنے کا فن تھا۔انہوں نے اس بات پر زور دیا کہ راہی معصوم رضا کے نظریات کو سیمیناروں سے آگے بڑھایا جائے اور عوام کےساتھ وسیع پیمانے پر شیئر کیا جائے، انہیں ہندوستان کے ترقی پسند معاشرے کےلئے ایک پوشیدہ بنیادی ڈھانچہ قرار دیا جائے۔ منوج سنہا نے کہا کہ راہی معصوم رضا کے خیالات اتحاد، مساوات اور اجتماعی ترقی کو فروغ دیتے ہیں، خاص طور پر پسماندہ برادریوں کو ترقی دیتے ہیں۔اس تقریب کا اہتمام مشترکہ طور پر IDEA کمیونیکیشنز، کشمیر یونیورسٹی، مجلس فخر بحرین اور جموں وکشمیر بینک نے کیا تھا۔وائس چانسلر کشمیر یونیورسٹی پروفیسر نیلوفر خان نے سیشن کی صدارت کی، جبکہ پروفیسر نوین چند لوہانی (اتراکھنڈ اوپن یونیورسٹی) اور برج موہن شرما (چیف سکریٹری، محکمہ ثقافت، جموں و کشمیر) نے بطور مہمان خصوصی شرکت کی۔ بالی ووڈ کے نامور گیت نگار سمیر انجان نے کلیدی خطبہ دیا۔اپنی تقریر میں، لیفٹیننٹ گورنر منوج سنہا نے کہا کہ سیمینار کا مقصد ایک ترقی یافتہ ہندوستان کے لئے راہی معصوم رضا کے وژن سے متاثر نئے خیالات پیدا کرنا ہے۔ انہوں نے کہا، ”یہ امرت منتھن معاشرے کےلئے نئی عکاسی اور ایک نیا راستہ لائے گا۔“تقریب کے دوران اُردو شاعر ڈاکٹر نور امروہوی، ایڈیٹر اجیت سنگھ، ماہر تعلیم وجے دھر، اور اردو اسکالر پروفیسر محمد زمان آزردہ کو ان کی ادبی اور سماجی خدمات کے لیے اعزاز سے نوازا گیا۔وائس چانسلر کشمیر یونیورسٹی پروفیسر نیلوفر خان نے روشنی ڈالی کہ راہی جیسے ادیب ہمیں ادب کی یاد دلاتے ہیں جو نہ صرف معاشرے کا آئینہ دار ہوتا ہے بلکہ اس کی رہنمائی بھی کرتا ہے۔سمیر انجان نے راہی کی جذباتی گہرائی کی تعریف کرتے ہوئے کہا کہ ان کے الفاظ براہ راست لوگوں کے دلوں سے جڑے ہوئے ہیں۔ پروفیسر لوہانی نے نوٹ کیا کہ راہی معصوم رضا کا ادب جذبات کا احترام کرتا ہے، سرحدوں کا نہیں، اور آج بھی بہت زیادہ متعلقہ ہے۔آئیڈیا کمیونیکیشنز کے ڈائریکٹر آصف اعظمی نے کہا کہ سیمینار راہی کی صد سالہ تقریبات کا آغاز ہے، جو 2026 تک جاری رہے گا۔سیمینار میں ہندوستان اور بیرون ملک سے 40 سے زیادہ اسکالرز کو اکٹھا کیا گیا ہے، جن میں قطر، امریکہ اور سرکردہ ہندوستانی یونیورسٹیوں کے نمائندے بھی شامل ہیں۔ وہ راہی معصوم رضا کی ادبی اور ثقافتی خدمات پر تحقیقی مقالے پیش کریں گے۔جموں و کشمیر اکیڈمی آف آرٹ، کلچر اور لینگوئج کے زیر اہتمام 2 نومبر کو ٹیگور ہال، سری نگر میں ایک مشاعرہ اور شاعرانہ سمپوزیم کا انعقاد کیا جائے گا۔ ہندوستان، قطر اور امریکہ کے شعراءشرکت کریں گے۔