اپنے اہلکاروں کی تنخواہ کے لئے وافر فنڈس دستیاب ہیں/ اے ڈی جی پی کشمیر

اپنے اہلکاروں کی تنخواہ کے لئے وافر فنڈس دستیاب ہیں/ اے ڈی جی پی کشمیر
سری نگر، یکم دسمبر/یو این آئی/جموں وکشمیر پولیس نے واضح کیا ہے کہ ان کے پاس اپنے اہلکاروں کو تنخواہ ادا کرنے کے لئے فنڈس کی کوئی کمی نہیں ہے۔پولیس کی طرف سے یہ وضاحت ان میڈیا رپورٹس کے بعد آئی ہے جن میں کہا گیا کہ بجٹ کی عدم دستیابی کے باعث پولیس کے ایک سیکشن کی تنخواہیں گذشتہ دو مہینوں سے رکی ہوئی ہیں۔ایڈیشنل ڈائریکٹر جنرل پولیس کشمیر وجے کمار نے اپنے ایک ٹویٹ میں وضاحت کرتے ہوئے کہا: ’سوشل میڈیا پر گردش کرنے والی ایک جعلی خبر کہ پولیس اہلکاروں کی تنخواہ پچھلے دو ماہ سے ادا نہیں کی گئی ہے، کے بارے میں وضاحت کی جاتی ہے کہ ہر ڈی ڈی او کے پاس تنخواہ کے مدات کے لئے وافر مقدار میں فنڈس دستیاب ہیں‘۔ایک پولیس ترجمان نے بعد ازاں کہا کہ پولیس ہیڈکوارٹر نے اپنے ملازمین بشمول نیشنل پینشن اسکیم (این پی سی) کے تحت آنے والے ملازموں کی تنخواہیں ادا کرنے کے لئے اپنے تمام یونٹوں کو مناسب مقدار میں فنڈس دستیاب رکھے ہیں۔انہوں نے کہا کہ کچھ میڈیا ادارے، میڈیا کے افراد اور کچھ لوگ یہ غلط خبریں پھیلا رہے ہیں کہ این پی ایس کے تحت آنے والے ملازمین کی گذشتہ دو ماہ سے تنخواہیں واگذار نہیں ہو رہی ہیں۔ان کا کہنا تھا کہ ایسی خبروں میں کوئی سچائی نہیں ہے لہذا اس غلط خبر کو مسترد کیا جاتا ہے۔بتادیں کہ پی ڈی پی صدر اور سابق وزیر اعلیٰ محبوبہ مفتی نے اس خبر کے رد عمل میں اپنے ایک ٹویٹ میں کہا تھا: ’افسوس کی بات ہے کہ فرنٹ لائن پر اپنی خدمات انجام دینے والوں کی تنخواہیں گذشتہ دو ماہ سے رکی ہوئی ہیں‘۔انہوں نے ٹویٹ میں کہا: ’ان کنبوں جن کی روزی روٹی اسی تنخواہ پر منحصر ہے، کی حالت زار اور درد کو سمجھا جا سکتا ہے‘۔یو این آئی