گاندربل//جے کے این ایس//جموں و کشمیر کے لیفٹنٹ گورنر منوج سنہا نے سنیچر کوکہاکہ بیرونی سرمایہ کاری سے لاکھوں لوگوں کیلئے روزگار اورملازمتوں کے مواقعے پیداہونگے ۔انہوںنے کہاکہ گزشتہ سال جموں وکشمیرمیں52ہزار کروڑ روپے مالیت کی سرمایہ کاری ہوئی جبکہ اگلے سال میں70000 کروڑ روپے کی سرمایہ کاری کی تجاویز موصول ہونے کی اُمید ہے ۔جے کے این ایس کے مطابق گاندربل میں ایک تقریب سے خطاب کرتے ہوئے جموں و کشمیر کے لیفٹیننٹ گورنر منوج سنہا نے کہا کہ ان کی حکومت کم سے کم انسانی مداخلت کو یقینی بنا کر بدعنوانی کے خاتمے کیلئے پرعزم ہے۔
انہوںنے کہاکہ یہ سب کچھ آن لائن کیا جا رہا ہے اور یہ اقربا پروری اور بدعنوانی کو ختم کرنے کا بہترین طریقہ ہے۔منوج سنہانے مزید کہا کہ ای گورننس فروغ پا رہی ہے اور جموں و کشمیر ای گورننس موڈ میں شامل ہو رہا ہے۔لیفٹنٹ گورنر منوج سنہا نے کہاکہ حکومت نے انتظامیہ کی کارکردگی کوبہتربنانے کیلئے شفافیت اورجوابدہی پرخاص توجہ مرکوز کی ،اوراس کے خاطرخواہ نتائج برآمد ہوئے ہیں ۔انہوں نے کہا کہ اس وقت جموں و کشمیر میں ایک لاکھ کروڑ مالیت کے ہائی وے اور ٹنل پروجیکٹ چل رہے ہیں۔گزشتہ ایک سال میں، 52000 کروڑ روپے سے زیادہ کی سرمایہ کاری موصول ہوئی ہے۔
نجی ہسپتالوں وغیرہ کے سلسلے میں 4500 کروڑ روپے کی سرمایہ کاری آرہی ہے. انہوں نے کہا کہ اگلے ایک سال میں70000 کروڑ روپے کی سرمایہ کاری کی تجاویز موصول ہوں گی جس سے 5 سے6 لاکھ ملازمتوں کے مواقع پیدا ہوں گے۔
