امت شاہ کے دورے کے پیش نظر سری نگر میں سیکورٹی کے فقید المثال انتظامات

امت شاہ کے دورے کے پیش نظر سری نگر میں سیکورٹی کے فقید المثال انتظامات
وزیر داخلہ نے جموں میں سیکورٹی صورتحال کا ایک اعلیٰ سطحی میٹنگ کے دوران جائزہ لیا
سری نگر04 اکتوبر یو پی آئی مرکزی وزیر داخلہ امت شاہ کے دورہ وادی کے پیش نظر وادی کشمیر بالخصوص شہر سری نگر کے قرب و جوار میں سکیورٹی کا فقید المثال بندوبست کیا گیا ہے۔بتادیں کہ وزیر داخلہ پیر کی شام کو تین روزہ دورے پر جموں پہنچے جہاں انہوں نے سیکورٹی صورتحال کا ایک اعلیٰ سطحی میٹنگ کے دوران جائزہ لیا ۔وزیر داخلہ کے اس دورے کے پیش نظر حکام نے وادی بالخصوص شہر سری نگر کے قرب و جوار میں سکیورٹی کے سخت انتظامات کئے ہیں اور کسی بھی ممکنہ ناخوشگوار واقعے کو ناکام بنانے کے لئے بھاری تعداد میں سکیورٹی اہلکاروں کو تعینات کیا گیا ہے۔نمائندے نے بتایا کہ شہر کے مختلف علاقوں کا دورہ کر کے بتایا کہ شہر کے تمام علاقوں میں سیکورٹی کے سخت انتظامات کئے گئے ہیں اور ناکوں کے جال کو مزید وسیع کر دیا گیا ہے۔انہوں نے بتایا کہ جنگی ساز و سامان سے لیس سیکورٹی اہلکار انتہائی چوکنا ہیں اور ناکوں پر موٹر سائیکلوں کی ضبطی کا سلسلہ بھی جاری ہے۔انہوں نے بتایا کہ ناکوں پر مسافر بردار گاڑیوں کی بھی تلاشی کی جاتی ہے اور ان میں سوار مسافروں کی بھی جامہ تلاشی اور ان کے شناختی کارڈ بھی چیک کئے جا رہے ہیں۔انہوں نے بتایا کہ کئی مقامات پر راہگیروں کو بھی روک کر ان کی تلاشی اور شناختی کارڈ چیک کئے جاتے ہیں۔دریں اثنا وزیر داخلہ کے دورے کے پیش نظر حکام نے سری نگر میں بلیوارڈ روڈ کو بڈیاری چوک سے نشاط تک اور گپکار روڈ کومنگل کی شام کو ٹریفک کی نقل و حمل کے لئے بند کردیا گیا۔پیر کی شام کو جوں ہی وزیر داخلہ جموں پہنچے تو سیدھے راج بھون میں پولیس، فوج اور خفیہ ایجنسیوں کے آفیسران کی ایک میٹنگ طلب کی۔ ذرائع نے بتایا کہ اس میٹنگ کے دوران وزیر داخلہ نے جموں وکشمیر کی سیکورٹی صورتحال کا جائزہ لیا۔ ذرائع نے کہاکہ میٹنگ کے دوران وزیر داخلہ کو بتایا گیا کہ سرگرم جنگجووں کے خلاف چلائے جارہے آپریشنز کامیابی سے ہمکنار ہو رہے ہیں۔ انہوں نے بتایا کہ جنگجووں کے خلاف زیرو ٹرولنس پر کاربند ہے اور اسی وجہ سے جموں وکشمیر میں حالات دھیرے دھیرے معمول پر آرہے ہیں۔ اس موقع پر وزیر داخلہ نے آفیسران کو ہدایت دی کہ سرگرم ملی ٹینٹوں اور اُن کے حامیوں کے خلاف سخت پالیسی اپنانے کی ضرورت ہے۔ انہوں نے کہاکہ عام شہریوں کی ہلاکتوں میں ملوث ملی ٹینٹوں کو کسی بھی صورت میں بخشا نہیں جائے گا۔ انہوں نے بتایا کہ ملی ٹینٹوں کے خلاف اپنائی جارہی پالیسی کامیابی سے ہمکنار ہو رہی ہے۔