جموں……….انفو….چیف سیکرٹری مسٹر اتل ڈولو نے ایک جامع جائیزہ اجلاس کی صدارت کی تا کہ نیشنل ہائی ویز لاجسٹکس منیجمنٹ لمٹیڈ ( این ایچ ایل ایم ایل ) کی جانب سے جموں و کشمیر میں جاری بڑے انفراسٹرکچر منصوبوں کی پیش رفت اور نفاذ کا جائیزہ لیا جا سکے ۔ اجلاس کی بنیادی توجہ پربت مالا اسکیم کے تحت روپ وے پروجیکٹ ، کٹرا میں انٹر ماڈل اسٹیشن ( آئی ایم ایس ) اور جموں میں ملٹی ماڈل لاجسٹکس پارک ( ایم ایم ایل پی ) کی حیثیت پر مرکوز رہی ، جو علاقے میں رابطہ کاری ، لاجسٹکس کی کارکردگی اور سیاحت کے انفراسٹرکچر کو بہتر بنانے کیلئے انتہائی اہم ہیں ۔ اجلاس میں اے سی ایس پی ڈبلیو ڈی ، سی ای او این ایچ ایل ایم ایل ، کمشنر سیکرٹری ہاوسنگ اینڈ اربن ڈیولپمنٹ ڈیپارٹمنٹ ( ایم اینڈ یو ڈی ڈی ) ، کمشنر سیکرٹری انڈسٹریز اینڈ کامرس ( آئی اینڈ سی ) ، ڈویژنل کمشنر جموں /کشمیر ، ڈائریکٹر جنرل بجٹ ، ڈائریکٹر انڈسٹریز جموں ، این ایچ ایل ایم ایل کے نمائندے اور دیگر سینئر افسران نے شرکت کی ۔ روپ وے منصوبوں کی پیش رفت کا جائیزہ لیتے ہوئے چیف سیکرٹری نے زور دیا کہ یو ٹی انتظامیہ پائیدار نقل و حمل کے حل کے ذریعے اہم سیاحتی مقامات تک بہتر رابطہ کاری کو ترجیح دے رہی ہے ۔ اجلاس کو آگاہ کیا گیا کہ این ایچ ایل ایم ایل نے سات ترجیحی پبلک پرائیویٹ پارٹنر شپ ( پی پی پی ) منصوبوں کیلئے تفصیلی پراجیکٹ رپورٹس ( ڈی پی آر ) تیار کرنے کیلئے ٹینڈر طلب کئے ہیں جن کی آخری تاریخ نومبر 2025 مقرر ہے ۔ چیف سیکرٹری نے ڈی پی آر کو بروقت حتمی شکل دینے کی اہمیت پر زور دیتے ہوئے کہا کہ یہ منصوبے سیاحت کو فروغ دینے اور اہم مذہبی اور خوبصورت مقامات تک آخری میل رابطہ فراہم کرنے کی زبردست صلاحیت رکھتے ہیں ۔ چیف سیکرٹری نے کٹرا میں انٹر ماڈل اسٹیشن ( آئی ایم ایس ) کی پیش رفت کا جائیزہ لیا ، جو شری ماتا ویشنو دیوی کے یاتریوں کیلئے ایک اہم اسٹریٹجک پراجیکٹ ہے ۔ اس منصوبے کا مقصد مختلف ذرایع نقل و حمل کا بغیر کسی رکاوٹ کے انضمام فراہم کرنا ہے تا کہ مسافروں کی سہولت اور سفر کی کارکردگی میں اضافہ ہو ۔ چیف سیکرٹری نے تمام زیر التوا مالیاتی اور انتظامی مسائل کو تیزی سے حل کرنے کیلئے فوری کارروائی کا مطالبہ کیا تا کہ پروجیکٹ کا بروقت آغاز یقینی بنایا جا سکے ۔ ایم ایم ایل پی جموں کی حیثیت کا جائیزہ لیتے ہوئے چیف سیکرٹری نے پروجیکٹ کیلئے مفاہمت کی یاداشت ( ایم او یو ) پر دستخط کو جلد از جلد مکمل کرنے پر زور دیا تا کہ ڈی پی آر سے متعلق کاموں بشمول ٹوپوگرافیکل اور جیو ٹیکنیکل سروے اور طلب کے جائیزے کا آغاز ہو سکے ۔ چیف سیکرٹری نے متعلقہ حکام کو ہدایت دی کہ زمین کی دستیابی کو جلد حتمی شکل دی جائے تا کہ این ایچ ایل ایم ایل بغیر کسی تاخیر کے گراو¿نڈ پر سرگرمیاں شروع کر سکے ۔ انہوں نے کہا کہ یہ پراجیکٹس سماجی و معاشی اہمیت کے حامل ہیں جو جموں و کشمیر میں بہتر رابطوں ، سیاحت اور لاجسٹکس کی ترقی میں نمایاں کردار ادا کریں گے ۔
چیف سیکرٹری نے جموں و کشمیر میں این ایچ ایل ایم ایل کے اہم انفراسٹرکچر منصوبوں کی پیش رفت کا لیا جائیزہ
