نئی دلی// نوجوانوں کے امور اور کھیل کی وزارت کے مرکزی وزیر جناب انوراگ سنگھ ٹھاکر نے کیش ایوارڈز، قومی بہبود اور کھلاڑیوں کو پنشن کی نظرثانی شدہ اسکیموں کا آغاز کیا۔ اس موقع پر انہوں نے کھیلوں کے محکمے کی اسکیموں کے لیے ویب پورٹل (dbtyas-sports.gov.in) اور قومی کھیل ترقیاتی فنڈ کا بھی آغاز کیا۔ جناب انوراگ ٹھاکر نے مطلع کیا کہ نوجوانوں کے امور اور کھیل کی وزارت نے بین الاقوامی کھیلوں کے مقابلوں میں میڈل جیتنے والوں اور ان کے کوچز، پنڈت دین دیال اپادھیائے نیشنل ویلفیئر فار اسپورٹس پرسنز اور میرٹوریئس اسپورٹس پرسن کو پنشن کی اسکیم میں کئی اہم ترامیم کی ہیں۔
ان سکیموں کو زیادہ صارف دوست، رسائی میں آسان اور شفاف بنانے کے وژن کے ساتھ محکمہ کھیل نے کئی اقدامات کئے ہیں۔مرکزی وزیر نے اس ترقی کو ڈیجیٹل انڈیا کی طرف شہریوں کو بااختیار بنانے اور حکومت اور شہریوں کے درمیان فرق کو کم کرنے، نظام اور سہولیات، مسائل اور حل اور کم سے کم حکومت اور زیادہ سے زیادہ حکمرانی کے وزیر اعظم کے وژن کو آگے بڑھاتے ہوئے سراہا۔ وزیر نے وضاحت کی کہ یہ نظرثانی شدہ اسکیمیں ریکارڈ وقت میں کھیلوں کے افراد کو فائدہ پہنچانے کے لیے مزید شفافیت اور جوابدہی فراہم کریں گی۔
شری ٹھاکر نے روشنی ڈالی کہ اب کوئی بھی انفرادی کھلاڑی اپنی اہلیت کے مطابق تینوں اسکیموں کے لیے براہ راست درخواست دے سکتا ہے۔ اس سے قبل تجاویز اسپورٹس فیڈریشنز کے ذریعے موصول ہوتی تھیں، جو کہ تجاویز جمع کرانے میں کافی وقت لیتی تھیں۔ بعض اوقات تجویز کو منظور کرنے میں 1-2 سال سے زیادہ کا وقت لگتا تھا۔ اب درخواست دہندہ کو مخصوص تقریب کے اختتام کی آخری تاریخ سے چھ ماہ کے اندر کیش ایوارڈ اسکیم کے لیے آن لائن درخواست دینے کی ضرورت ہے۔مرکزی وزیر نے مزید بتایا کہ پروسیسنگ کے وقت کو کم کرنے کے لیے تینوں اسکیموں میں تصدیق کے عمل کو کافی حد تک آسان کردیا گیا ہے۔ اس بات کو یقینی بنانے کے لیے کہ کوچز کو ان کا نقد ایوارڈ بروقت ملے، اسکیم میں مطلوبہ تبدیلیاں کی گئی ہیں۔ ڈیف اولمپکس کے کھلاڑیوں کو بھی پنشن کے فوائد میں توسیع کردی گئی ہے۔
