بجبہاڑہ اننت ناگ میں منشیات اسمگلنگ کے ایک بڑے نیٹ ورک کا پردہ فاش

سری نگر ۳۱،ستمبرجے کے این ایس انسدادمنشیات بیورو سری نگر زون نے جنوبی کشمیر میں منشیات کی اسمگلنگ کے ایک بڑے نیٹ ورک کا پردہ فاش کرتے ہوئے ایک اہم سپلائر اور2عادی مجرموں سمیت3 افراد کو گرفتار کیا ۔جے کے این ایس کے مطابق حکام نے بتایا کہ یہ آپریشن19 اگست کو ضلع اننت ناگ کے بجبہاڑہ علاقے میں مخصوص انٹیلی جنس معلومات کی بنیاد پر کیا گیا تھا۔ چھاپے کے نتیجے میں تقریباً 10 کلو735 گرام چرس برآمد ہوئی، جو موجودہ سال کی سب سے بڑی ضبطی میں سے ایک ہے۔انہوں نے بتایاکہ منشیات کنٹرول بیورو سری نگر زون نے ایک اہم سپلائرسمیت 3 ملزمان کی گرفتاری ہوئی،جن کی شناخت فردوس ساکنہ بجبہاڑہ،جان محمد باباساکنہ لال بازار سری نگر کا جان محمد بابا اور محمد لطیف ساکنہ سری گفوارہ، اننت ناگ کے طور پرہوئی ہے۔ان کے پس منظر کی توثیق سے یہ بات سامنے آئی کہ فردوس کے خلاف پہلے بھی این ڈی پی ایس ایکٹ کے تحت پولیس اسٹیشن بجبہاڑہ اور این سی بی جموں میں درج مقدمات میں مقدمہ درج کئے گئے تھے، جب کہ جان محمد بابا بھی اس سے قبل منشیات کنٹرول بیورو( این سی بی جموں )کے درج کردہ ایک کیس میں ملوث تھے۔ تحقیقات میں مزید یہ بات سامنے آئی کہ ضبط شدہ کھیپ محمد لطیف سے منگوائی گئی تھی، جو غیر قانونی ذرائع سے بین ریاستی نقل و حمل کی سہولت فراہم کر رہا تھا۔ حکام نے کہا، جموں و کشمیر میں انسداد منشیات کے نفاذ کو مضبوط بنانے کےلئے مرکزی حکومت کی وسیع حکمت عملی کا حصہ ہے۔ انہوں نے مزید کہا کہ انسدادمنشیات بیورو(این سی بی) منشیات کے کاروبار کو روکنے، نوجوانوں کو اس کے نقصان دہ اثرات سے بچانے، اور مرکز کے زیر انتظام علاقوں میں نافذ کرنے والی ایجنسیوں کے درمیان مضبوط تال میل کو یقینی بنانے کےلئے پرعزم ہے۔حکام نے شہریوں سے اپیل کی ہے کہ وہ منشیات کی اسمگلنگ کےخلاف جنگ میں تعاون کریں اور MANAS نیشنل نارکوٹکس ہیلپ لائن نمبر1933 کے ذریعے منشیات کی سرگرمیوں کے بارے میں معلومات شیئر کریں، اس بات کی یقین دہانی کراتے ہوئے کہ اطلاع دینے والوں کی شناخت کو صیغہ راز میں رکھا جائے گا۔