جسٹس علی محمد ماگرے نے بطور چیف جسٹس حلف لیا

جسٹس علی محمد ماگرے نے بطور چیف جسٹس حلف لیا
سرینگر13اکتوبر سی این آئی جسٹس علی محمد ماگرے نے جموں ، کشمیر اور لداخ ہائی کورٹ کے نئے چیف جسٹس کے بطور حلف لیا ۔ سی این آئی کے مطابق لیفٹنٹ گورنر منوج سنہا نے جمعرات کی صبح جسٹس علی محمد ماگرے کو جموں ، کشمیر اور لداخ ہائی کورٹ کے نئے چیف جسٹس کے بطور حلف دلایا ۔ جسٹس علی محمد ماگرے کی حلف برداری تقریب میں لیفٹنٹ گورنر منوج سنہا کے علاوہ ہائی کورٹ کے کچھ جج ، ایڈوکیٹ جنرل اور پولیس و سیول انتظامیہ کے افسران موجود تھے ۔ جسٹس علی محمد ماگرے جموں ، کشمیر اور لداخ ہائی کورٹ کے 35ویں چیف جسٹس کے بطور مقرر کئے گئے ہیں ۔ اسی دوران لیفٹنٹ گورنر منوج سنہا نے جسٹس ماگرے کو ان کی نئی تقرری پر مبارکباد دی۔ واضح رہے کہ 28 ستمبر کو سپریم کورٹ کے کالجیم نے چیف جسٹس آف انڈیا یو یو للت کی صدارت میں ایک میٹنگ کے دوران جسٹس ماگرے کی ترقی کی سفارش کی تھی۔یاد رہے کہ یہ فیصلہ جے کے اینڈ ایل ہائی کورٹ کے سابق چیف جسٹس پنکج مٹھل کی راجستھان ہائی کورٹ میں منتقلی کے پیش نظر کیا گیا تھا۔ جسٹس علی محمد ماگرے 8 دسمبر 1960 کو پیدا ہوئے۔ انہوں نے 1984 میں ریونیو کورٹس/ٹربیونلز اور ہائی کورٹ اور ڈسٹرکٹ کورٹس میں بطور وکیل پریکٹس شروع کی۔ انہیں مارچ 2013 میں جموں و کشمیر ہائی کورٹ کا جج مقرر کیا گیا تھا۔