ہم نوگام دھماکہ میں جاں بحق اہلکاروں کو کبھی نہیں بھولیں گے/پولیس سربراہ

سرینگر….17نومبر ….سی این آئی ….جموں و کشمیر پولیس المناک دھماکے میں جاں بحق ہونے والے تمام اہلکاروں کے اہل خانہ کے ساتھ مضبوطی سے کھڑی رہے گی کی بات کرتے ہوئے جموں کشمیر پولیس سربراہ نلین پربھات نے کہا کہ ہم انہیں کبھی نہیں بھولیں گے۔ انہوں نے مزید کہا کہ واقعے سے متاثرہ ہر خاندان کو ضروری امداد فراہم کی جائے گی۔سی این آئی کے مطابق جموں و کشمیر پولیس سربراہ نلین پربھات اور انسپکٹر جنرل آف پولیس کشمیر زون وی کے بردی نے نوگام پولیس اسٹیشن دھماکے میں اپنی جان گنوانے والے پولیس اہلکاروں میں سے سینئر گریڈ کانسٹیبل اعجاز احمد میر کی غزالی آباد ایچ ایم ٹی رہائش گاہ اور ترال میں کرائم فوٹو گرافر کی رہائش گاہ کا دورہ کرکے وہاں لواحقین کی ڈھارس بندھائی اور ان سے تعزیت کی ۔ اعلیٰ افسران نے دونوں کے اہل خانوں سے ملاقات کی اور محکمہ پولیس کی جانب سے تعزیت پیش کی۔دورے کے دوران ڈی جی پی پربھات نے صحافیوں کو بتایا کہ جموں و کشمیر پولیس المناک دھماکے میں ہلاک ہونے والے تمام اہلکاروں کے اہل خانہ کے ساتھ مضبوطی سے کھڑی رہے گی۔ انہوں نے کہا ”ہم انہیں کبھی نہیں بھولیں گے۔ “ انہوں نے مزید کہا کہ واقعے سے متاثرہ ہر خاندان کو ضروری امداد فراہم کی جائے گی۔انہوں نے کہا کہ انہوں نے سوگوار خاندانوں کو صبر اور طاقت کا پیغام دیا ہے اور اس بات کی تصدیق کی ہے کہ ڈیوٹی کے دوران اپنی جانیں گنوانے والے تمام نو اہلکاروں کے لیے امدادی اقدامات کو مربوط کیا جا رہا ہے۔