سرینگر//جموں و کشمیر کے لیفٹیننٹ گورنر منوج سنہا نے جموں و کشمیر کی تمام سیاسی جماعتوں کے سربراہوں کو بدھ کی شام کو راج بھون میں چائے پر مدعو کیا ہے تاکہ 30 جون سے شروع ہونے والی امرناتھ یاترا کیلئے کیے گئے انتظامات کے علاوہ دیگر کئی اہم معاملات پر غور و خوض کیا جا سکے۔ ذرائع نے کے این ایس کو بتایا کہ ایل جی نے جموں و کشمیر کی تمام سیاسی جماعتوں کو آج شام 6 بجے راج بھون میں چائے پینے کیلئے دعوت نامہ بھیجا ہے تاکہ امرناتھ یاترا کے پرامن انعقاد کے لیے بات چیت اور غور و خوض کیا جا سکے جبکہ بات چیت میں جموں کشمیر کے دیگر اہم مسائل اور معاملات کے متعلق بھی تبادلہ خیال کیا جائے گا۔ذرائع نے مزید بتایا کہ ایل جی نے بدھ کی صبح جموں بیس کیمپ سے امرناتھ یاتریوں کی پہلی کھیپ کو کشمیر کی طرف جانے کیلئے ہری جھنڈی دکھائی تاہم ذرائع نے بتایا کہ اگرچہ ایل جی جموں میں تھے تاہم اسی دوران راج بھون نے جموں و کشمیر کی تمام سیاسی جماعتوں کے سربراہوں کو دعوت نامہ بھیجا۔ذرائع نے بتایا کہ ایل جی منوج سنہا جیسے ہی آج سری نگر پہنچیں گے وہ مقدس یاترا کے احسن انعقاد کے پیش نظر سیاسی جماعتوں کے سربراہان کے ساتھ میٹنگ کریں گے۔ذرائع نے بتایا کہ جن لوگوں کو میٹنگ میں مدعو کیا گیا ہے ان میں بی جے پی کے ریاستی صدر رویندر رینہ، این سی کے صدر ڈاکٹر فاروق عبداللہ، پی ڈی پی صدر محبوبہ مفتی، پیپلز کانفرنس کے چیئرمین سجاد غنی لون، اپنی پارٹی کے صدر سید الطاف بخاری، سی پی آئی (ایم) لیڈر محمد یوسف تاریگامی اور جے کے پی سی سی کے صدر جی اے میر، پی ڈی ایف کے صدر حکیم محمد یاسین اور دیگر کئی دوسرے لیڈر شامل ہیں۔قابل ذکر بات یہ ہے کہ امرناتھ یاترا کووڈ19 وبائی امراض کی وجہ سے معطل رہنے کے دو سال کے وقفے کے بعد منعقد کی جا رہی ہے جبکہ آرٹیکل 370اور 35 اے کی منسوخی کے پیش نظر 2019 میں یاترا کو مختصر کر دیا گیا تھا۔امرناتھ یاترا کو احسن طریقے سے منعقد کرانے کیلئے جموں و کشمیر میں سیکورٹی فورسز کی اضافی 500کمپنیوں کو تعینات کردیا گیا ہے اور اس طرح اس حوالے سے یقینی طور پر مثالی حفاظتی اقدامات اٹھائے گئے ہیں۔دریں اثنا جموں و کشمیر میں سیاسی جماعتوں کے چند سربراہوں نے کے این ایس کے بات کرتے ہوئے اس بات کی تصدیق کی کہ انہیں ایل جی نے آج راج بھون میں چائے پر مدعو کیا ہے۔کے این ایس سے بات کرتے ہوئے بی جے پی کے ریاستی صدر رویندر رینا نے کہا کہ انہیں بھی شام 6 بجے ہائی ٹی پر مدعو کیا گیا ہے جس میں پارٹی کے دیگر سربراہان بشمول فاروق عبداللہ، محبوبہ مفتی، الطاف بخاری اور دیگر لیڈران شامل ہیں۔
ایل جی نے جموں و کشمیر کی تمام سیاسی جماعتوں کے سربراہوں کو ’’چائے‘‘پر راج بھون میں کیا ہے مدعو
راج بھون میں منعقدہ میٹنگ میں امرناتھ یاترا کے پرامن انعقاد اور دیگر اہم مسائل پر ہوئی بات/ذرائع
