جموں…..انفو….نائب وزیر اعلیٰ سریندر کمار چودھری نے جموں و کشمیر بھر میں عوامی شکایات کے خوش اسلوبی سے ازالے اور بلا تعطل خدمات کی فراہمی کو یقینی بنانے پر زور دیا۔اُنہوں نے اِن باتوں کا اِظہار آج سول سیکرٹریٹ جموں میں مختلف عوامی وفود سے ملاقات کے دوران کیا۔ اُنہوں نے اِس بات کا اعادہ کیا کہ حکومت جموں و کشمیر کی مجموعی اور جامع ترقی کے لئے پوری طرح پُرعزم ہے۔نائب وزیر اعلیٰ نے اَفسران کو ہدایت دی کہ عوامی مسائل کو ترجیحی بنیادوں پر حل کریں اور عوام کی دہلیز پر فوری خدمات کی فراہمی کو یقینی بنائیں۔دورانِ بات چیت اُنہوں نے جموں و کشمیر کے مختلف اَضلاع سے آئے وفود سے ملاقات کی جن میں طلبا¿، ملازمت کے خواہشمند، اُبھرتے ہوئے کاروباری افراد، تجارتی انجمنوں کے نمائندے، سول سوسائٹی تنظیمیں اور متعدد اِنفرادی وفود شامل تھے۔ وفود نے انہیں اَپنے مسائل، مطالبات اورکئی اہم مسائل سے آگاہ کیا۔نائب وزیرا علیٰ نے وفود کو بغور سُنا اور اُنہیں یقین دِلایا کہ تمام جائز مسائل کو متعلقہ محکموں کے ساتھ اُٹھایا جائے گا تاکہ اُن کا فوری حل ممکن بنایا جا سکے۔اُنہوں نے حکومت کی مختلف فلاحی اور ترقیاتی سکیموں کے تحت بروقت خدمات کی فراہمی اور اِستفادہ کنندگان کی زیادہ سے زیادہ شمولیت کی ضرورت پر بھی زور دیا۔سریندر کمار چودھری نے جموں و کشمیر بھر میں جاری ترقیاتی سرگرمیوں کی بروقت تکمیل اور معیاری کام کو یقینی بنانے پر بھی زور دیا۔اِس موقعہ پر اُنہوں نے متعدد مسائل کے فوری اور خوش اسلوبی سے حل کے لئے متعلقہ افسران کو موقعے پر ہی ہدایات جاری کیں۔
نائب وزیر اعلیٰ نے جموں میں متعدد وفودو اَفراد سے ملاقات کی
