واٹر شیڈ ڈیولپمنٹ دیہی اور زرعی ترقی کی کلید /جاوید ڈار

جموں 24 دسمبر /انفو/وزیر برائے زرعی پیداوار ، دیہی ترقی ، پنچائتی راج ، کواپریٹو اور الیکشن مسٹر جاوید احمد ڈار نے آج کہا کہ واٹر شیڈ ڈیولپمنٹ دیہی علاقوں کی ترقی میں اہم کردار نبھانے کے ساتھ ساتھ زرعی شعبے کو مضبوط کرتا ہے ۔ وزیر نے ان باتوں کا اظہار انٹی گریٹڈ واٹر شیڈ منیجمنٹ پروگرام ( آئی ڈبلیو ایم پی ) جموں و کشمیر کے تحت دیہی ترقی اور پنچائتی راج محکمہ کی جانب سے پنچائت بھون ریلوے روڈ جموں میں منعقد کئے گئے واٹر شیڈ مہوتسو 2025 کے موقع پر کیا ۔ اجتماع سے خطاب کرتے ہوئے وزیر موصوف نے واٹر شیڈ منیجمنٹ میں عوامی شرکت ( جن بھاگیداری ) کی اہمیت پر زور دیا ، موجودہ واٹر شیڈ اثاثوں کی بحالی اور پائیدار طریقوں سے دیہی علاقوں کی تبدیلی پر زور دیا ۔ انہوں نے محکمہ کی کاو¿شوں اور حکومت ہند کے زیر اہتمام اسکیموں کی تعریف کی جو موجودہ اور آئندہ نسلوں کیلئے زیر زمین پانی کے وسائل کے تحفظ کا مقصد رکھتی ہیں ۔ وزیر نے پروجیکٹس کی عمل درآمد کے دوران شفافیت اور احتساب کی ضرورت پر زور دیا تا کہ عوام کو موثر خدمات کی فراہمی یقینی بنائی جا سکے ۔ گلوبل وارمنگ کو دنیا کی سب سے بڑا چیلنج قرار دیتے ہوئے انہوں نے کہا کہ اس بڑھتے ہوئے خطرے سے ہر جاندار متاثر ہے ۔ انہوں نے مزید کہا کہ حکومت ہند اور جموں و کشمیر میں عمر عبداللہ کی قیادت میں حکومت نے ماحولیات کے تحفظ کیلئے متعدد اقدامات اٹھائے ہیں ۔ مسٹر جاوید احمد ڈار نے افسران کو جموں و کشمیر ڈویژن کے بارش پر انحصار کرنے والے علاقوں ( رین فیڈ ایریاز ) پر خصوصی توجہ دینے کی ہدایت دی ۔ انہوں نے نشاندہی کی کہ جموں ، سانبہ اور کٹھوعہ اضلاع کے کنڈی علاقوں میں بہت زیادہ صلاحیت موجود ہے اس لئے ان علاقوں میں زیادہ سے زیادہ آئی ڈبلیو ایم پی پروجیکٹس نافذ کئے جائیں ۔ انہوں نے واٹر شیڈ کمیٹیوں اور ان کے چئیر پرسنز سے اپیل کی کہ وہ حقیقی اور ضروری بنیاد پر کام یقینی بنائیں تا کہ متاثرہ افراد ان پروجیکٹس کے فوائد سے مکمل طور پر مستفید ہوں ۔ وزیر نے زور دیا کہ واٹر شیڈ ڈیولپمنٹ دیہی علاقوں کی ترقی اور زرعی شعبے کو مضبوط کرنے کیلئے انتہائی اہم ہے ۔ اس موقع پر سیکرٹری رورل ڈیولپمنٹ اینڈ پنچائتی راج محمد اعجاز اسد نے کہا کہ واٹر شیڈ پروگرام کا بنیادی مقصد قدرتی وسائل کا تحفظ ہے اور یہ تحفظ تب ہی ممکن ہے جب ان وسائل کی ملکیت عوام کو سونپی جائے ۔ ایونٹ کے دوران تین اضلاع بڈگام ، راجوری اور پونچھ کو واٹر شیڈ اقدامات میں شاندار کارکردگی کیلئے ہر ایک کو 20 لاکھ روپے کے ایوارڈ دئیے گئے ۔ ایونٹ میں سیکرٹری آر ڈی ڈی اینڈ پی آر ، ڈائریکٹر آر ڈی ڈی کشمیر ، ڈائریکٹر پنچائتی راج ، ڈائریکٹر آر ڈی ڈی جموں ، چیف ایگزیکٹو آفیسر آئی ڈبلیو ایم پی اور دیگر افسران نے شرکت کی ۔