جموں کشمیر اور لداخ میں فوج کی قربانیوں کی بدولت ملک مضبوط ہوا وزیر دفاع راجناتھ سنگھ

سرینگر۔۔۔14جنوری۔۔۔۔وی او آئی۔۔۔۔وزیر دفاع راجناتھ سنگھ نے کہا ہے کہ مسلح افواج کے سابق فوجی قومی شعور کے زندہ ستون اور اجتماعی جرات کی علامت ہیں، جو اپنی قربانیوں اور اوصاف کے ذریعے آنے والی نسلوں کے لیے تحریک کا ذریعہ ہیں۔وائس آف انڈیا کے مطابق وزیر دفاع نے کہا کہ جموں کشمیر اور لداخ میں ان سابق فوجیوں نے جو اپنی خدمات انجام دیں ہیں اس کی بدولت خطے میں نہ صرف امن و تعمیر و ترقی کا نیا دور جاری ہے بلکہ ہندوستان بھی محفوظ رہا ہے اور اندارنی خطرہ ختم ہوا ہے ۔ انہوںنے بتایا کہ ہم ان تمام فوجیوں کو سلام پیش کرتے ہیں جنہوںنے ماتر بھومی کی خاطر قربانیاں پیش کی ہیں ۔ راج ناتھ سنگھ نے بتایا کہ وادی کشمیر کی پہاڑی خطوں میں تعینات فوج جب ہماری خاطر سخت سردی برداشت کرتے ہیں تو ہی ہم یہاں پر چین کی سانس لے سکتے ہیں ۔ انہوںنے بتایا کہ لداخ، جموں کشمیر ہو یا شمالی مشرقی ریاستیں ہوں فوج نے ہر محاذ پر اپنی ذمہ داریاں نبھائیں ہیں انہوںنے بتایا کہ کرگل جنگ ہو، آپریشن سندور ہو یا 65کی جنگ ہو ہماری فوج نے کبھی پسپائی نہیں دکھائی اور ہمیشہ اپنی قربانیاں پیش کیںاس لئے سابق فوجیوں کی وہ خدمات ہمیشہ یاد رہیں گی جو انہوںنے ملک کی سلامتی اور تحفظ کےلئے دی ہیں۔ وزیر دفاع راجناتھ سنگھ نے بدھ کے روز مسلح افواج کے ویٹرنز ڈے کی تقریب سے خطاب کرتے ہوئے کہا کہ سابق فوجی ملک کی تعمیر کے ہر محاذ پر اپنا کردار ادا کرتے ہیں اور اپنی صفات جیسے نظم و ضبط، قیادت اور جرات کے ذریعے سماج کی رہنمائی کرتے ہیں۔ انہوں نے کہا کہ سابق فوجیوں کی وردی کا رنگ اور کام کی جگہ بدل سکتی ہے لیکن حب الوطنی اور خدمت کا جذبہ ہمیشہ قائم رہتا ہے۔ راجناتھ سنگھ نے کہا کہ یہ سابق فوجی نہ صرف قومی شعور کے ستون ہیں بلکہ اجتماعی جرات کی علامت بھی ہیں، اور ان کی خدمات آنے والی نسلوں کے لیے مشعلِ راہ ہیں۔ وزیر دفاع نے مزید کہا کہ ملک ان کی قربانیوں اور خدمات کو ہمیشہ یاد رکھے گا اور ویٹرنز ڈے کا مقصد بھی یہی ہے کہ ان کی خدمات کو تسلیم کیا جائے اور انہیں عزت دی جائے۔