علیحدگی پسندوں کو مین اسٹریم میں شامل ہونے کے سوا کوئی اوپشن ہی نہیں ہے/بی جے پی لیڈر سنیل شرما

علیحدگی پسندوں کو مین اسٹریم میں شامل ہونے کے سوا کوئی اوپشن ہی نہیں ہے/بی جے پی لیڈر سنیل شرما
سری نگر،26 اکتوبر/یو این آئی/ بی جے پی کے سینئر لیڈر اور سابق وزیر سنیل شرما کا کہنا ہے کہ تمام حریت لیڈر اور علاحدگی پسند قومی دھارے میں شامل ہوں گے کیونکہ وہ جانتے ہیں کہ ان کے لئے سارے دروازے بند ہوئے ہیں اور ان کی جگہ صرف جیل میں ہے۔انہوں نے دعویٰ کیا کہ پاکستان کے ایما پر جو یہ لوگ دکان چلا رہے تھے وہ بند ہوچکے ہیں اور ان کا اب کوئی گاہک نہیں رہا ہے۔موصوف وزیر نے ان باتوں کا اظہار بدھ کو یہاں یوم الحاق کے موقعے پر منعقدہ ایک تقریب کے حاشیے پر نامہ نگاروں کے سوالوں کے جواب دینے کے دوران کیا۔بلال غنی لون کی طرف سے قومی دھارے میں شامل ہونے کی خبروں کے بارے میں پوچھے جانے پر انہوں نے کہا: ’حریت لیڈروں اور علاحدگی پسندوں کے لئے اب صرف دو ہی اوپشنز ہیں یا تو وہ قومی دھارے میں شامل ہو جائیں یا جیل جائیں‘۔ان کا کہنا تھا: ’ان تمام لوگوں بشمول حریت لیڈروں اور علاحدگی پسندوں کے لئے ایک ہی اوپشن بچا ہے کہ وہ قومی دھارے میں شامل ہوجائیں ان کے تمام دروازے بند ہوگئے ہیں اب انہیں یا تو قومی دھارے میں شامل ہونا ہے یا جیل جانا ہے‘۔مسٹر شرما نے کہا کہ پاکستان کے ایما پر چلنے والے حریت لیڈروں کے دکان بند ہوئے ہیں اور اب ان کا کوئی گاہک نہیں رہا ہے۔انہوں نے کہا: ’اب ان کے لئے یہ اوپشن ہے کہ وہ اب انہیں انڈیا کے دکان کھولنے ہیں کیونکہ اب یہی دکان جموں وکشمیر میں چلنے والے ہیں‘۔ان کا کہنا تھا کہ حریت لیڈروں کو اپنی روش درست کرنی چاہئے یا جیل جانے کے لئے تیار رہنا چاہئے۔الحاق کے حوالے سے موصوف لیڈر نے کہا کہ یوم الحاق کو جموں و کشمیر میں تاریخی حیثیت حاصل ہے اس کو ان لوگوں کی یاد میں منایا جا تا ہے جنہوں نے اس دن اپنی جانوں کی قربانیاں پیش کیں۔یو این آئی