ڈی سی کولگام نے ضلع میں سی او ٹی پی اے ۔2003 کی عمل آوری کا جائزہ لیا
کولگام … انفو … ضلع ترقیاتی کمشنر کولگام ڈاکٹر بلال محی الدین بٹ نے ضلعی سطح کی رابطہ کمیٹی برائے قومی تمباکو کنٹرول پروگرام میٹنگ کی صدارت کی اورضلع میں سگریٹ اور دیگر مصنوعات ایکٹ( سی او ٹی پی اے)۔2003 کی عمل آور ی کے اَقدامات کا جائزہ لیا۔ضلع ترقیاتی کمشنر نے میٹنگ سے خطاب کرتے ہوئے اَفسران کو ہدایت دی کہ ضلع میں سی او ٹی پی اے ۔2003 کی دفعات پر سختی سے عمل در آمد کو یقینی بنایا جائے ۔اِس کے علاوہ اُنہوں نے سکولوں او رکالجوں میں بیداری پروگرام منعقد کرنے پر زور دیا ۔اُنہوں نے اَفسران کو ہدایت دی کہ وہ ہسپتالوں ، تعلیمی اِداروں ، سرکاری دفاتر ، پبلک ٹرانسپورٹ کے اَندر اور اس کے اِرد گرد خلاف ورزی کرنے والوں پر جُرمانے عائد کرنے کی مہم کو تیز کریں اور اُنہوں نے مزید کہا کہ اس سے مجرموں کو ایسی سرگرمیوں سے باز رہنے کا سخت پیغام ملے گا۔میٹنگ میں ضلع میں سی او ٹی پی اے کی عمل آوری کے نوڈل آفیسر کو ہدایت دی گئی کہ وہ عوامی مقامات پر سگریٹ نوشی کرنے والے مجرموں کے چالان کو یقینی بنائیں۔اُنہوں نے اُنہیں چالان کی تعداد ، جُرمانے کی وصولی او ردیگر کنٹرولنگ اقدامات کے حوالے سے ماہا نہ رِپورٹ پیش کرنے کی بھی ہدایت دی۔تمباکو سے پاک سکولوں ، کالجوں کے پرنسپلوں ، چیف ایجوکیشن آفیسر اور زونل ایجوکیشن اَفسران کو ہدایت دی گئی کہ وہ اِس بات کو یقینی بنائیں کہ ضلع میں کالج اور سکول کے اَحاطے کے 100 گز کے اَندر تمباکو کی مصنوعات اور سگریٹ کی فروخت نہ ہو۔اِس سے قبل سٹیٹ نوڈل آفیسر تمباکو کنٹرول پروگرام ڈائریکٹوریٹ ہیلتھ سروسز کشمیر ڈاکٹر میر مشتاق نے سی او ٹی پی اے ۔2003 کے بارے میں تفصیلی پرزنٹیشن اور نیشنل ٹوبیکو کنٹرول پروگرام کا جائزہ دیا۔میٹنگ میں ایڈیشنل ڈسٹرکٹ ڈیولپمنٹ کمشنر شوکت احمد راتھر، ایڈیشنل ڈپٹی کمشنر وقار احمد گیری ، ایس ڈی ایم بشیر الحسن ، ڈی ایس ڈبلیو او ، جی ڈی سی کے پرنسپلوں ، سی ایم او بی ایم اوز کے علاوہ سٹیٹ ٹو بیکو کنٹرول سیل ڈی ایچ ایس کے کے اَفسران اور دیگر متعلقین نے شرکت کی۔
