بجلی پروجیکٹوں کو چلانے کیلئے برفباری ضروری/ لیفٹنٹ گورنر منوج سنہا

بجلی پروجیکٹوں کو چلانے کیلئے برفباری ضروری/ لیفٹنٹ گورنر منوج سنہا
سرینگر16جنوری۔۔۔۔۔۔۔ ایس این این۔۔۔۔۔۔۔۔ جموں کشمیر میں سیاحتی شعبہ ترقی کررہا ہے کی بات کرتے ہوئے لیفٹنٹ گورنر منوج سنہا نے امید ظاہر کی کہ چلا کلان میں خشکی کا روزہ جلد ٹوٹ کربرفباری ہوگی اور کہا کہ بجلی پروجیکٹوں کو چلانے کیلئے برفباری ضروری ہے ۔ انہوں نے مزید کہا کہ او بی سی طبقہ کیلئے ریزرویشن کا عمل مکمل ہونے کے بعد ہی جموں کشمیر میں اربن لوکل باڈیز اور پنچایتوں کے انتخابات منعقد ہونگے ۔ سٹار نیو ز نیٹ ورک ( ایس این این ) کے مطابق بارہمولہ میں ایک تقریب سے خطاب کرتے ہوئے لیفٹنٹ گورنر منوج سنہا نے کہا کہ کشمیر میں اس وقت خشک سردی کا راج ہے۔ انہوں نے کہا ”میں خدا سے برف کیلئے دعا کرتا ہوں کیونکہ بجلی پروجیکٹوں کو چلانے کیلئے برف باری ضروری ہے، ورنہ وہ ناکارہ ہو جائیں گے“۔ انہوں نے مزید کہا کہ سیاحت کے شعبے کو ترقی کی منازل طے کرنے کیلئے برف باری بھی ضروری ہے۔لیفٹنٹ گورنر منوج سنہا نے کہا کہ گزشتہ سال 13 لاکھ سیاحوں نے گلمرگ کا دورہ کیا تھا اور وہاں برف باری ایک خاص توجہ کا مرکز رہی ہے۔ انہوں نے کہا کہ بارہمولہ ضلع میں چھ نئے مقامات کو فہرست میں شامل کیا گیا ہے لیکن برف کی غیر موجودگی میں سیاح دور رہنے کو ترجیح دیں گے۔لیفٹنٹ گورنر منوج سنہا نے کہا ”او بی سی کو تحفظات مکمل ہونے کے بعد جلد ہی اربن لوکل باڈیز (یو ایل بی) اور پنچایتوں کے انتخابات شروع کیے جائیں گے“۔ انہوں نے کہا کہ اس سمت میں کام جاری ہے اور ایک بار جب یہ عمل ختم ہو جائے گا، اربن لوکل باڈیز اور پنچایتوں کے انتخابات کرائے جائیں گے۔لیفٹنٹ گورنر نے بارہمولہ کے لوگوں پر زور دیا کہ وہ 26 جنوری یوم جمہوریہ کو جھنڈا اونچا رہے ہمارا پروگرام میں بڑی تعداد میں شرکت کریں۔ انہوں نے کہا میں چاہتا ہوں کہ بارہمولہ کا آسمان ترنگا سے بھر جائے۔انہوں نے کہا کہ بارہمولہ ضلع نوجوانوں کی فعال شمولیت سے ہر محاذ پر ترقی کی منازل طے کر رہا ہے۔انہوں نے مزید کہا کہ ہم کافی حد تک عوام کی امیدوں اور امنگوں پر پورا اترنے میں کامیاب رہے ہیں۔ لوگوں کے پاس بہتر معیار زندگی اور ترقی کے مساوی معاشی مواقع ہیں۔