الیکشن کمیشن آف انڈیا نے عمررسیدہ لوگوں اور معذور اَفراد کیلئے گھر پر ووٹنگ کی سہولیت فراہم کی

جموں….انفو…..جموںوکشمیر یوٹی میں 2024 ءکے لوک سبھا اِنتخابات میں عمررسیدہ لوگوں اور معذور اَفراد کے لئے پہلی بار گھر پرووٹ ڈالنے کی سہولیت فراہم کی گئی ہے۔زائد اَز 85 برس عمر کے رائے دہندگان اور 40 فیصد معذور اَفراد اِختیاری گھر گھرووٹنگ سہولیت سے فائدہ اُٹھا سکتے ہیں۔ اِس زُمرے کے رائے دہندگان نے پہلے اور دوسرے مرحلے کے لئے پہلے ہی اَپنا ووٹ ڈالنا شروع کیاہے۔یہ اَقدام اِنتخابی عمل کی شمولیت اور رَسائی کو یقینی بنانے اور جمہوری شرکت کوتقویت دینے کی طرف ایک اہم پیش رفت ہے۔ اِس سہولیت کو بالخصوص دو اہم آبادیاتی گروپوں تک بڑھایا گیاہے۔معذور اَفراد (پی ڈبلیو ڈی) 40فیصد بینچ مارک معذوری کے معیار پر پورا اُترتے ہیں اور بزرگ شہری جن کی عمر 85 برس سے زیادہ ہے۔یہ اِختیاری سہولیت الیکشن کمیشن آف اِنڈیا کے اس عزم کی عکاسی کرتی ہے کہ وہ اِس بات کو یقینی بنائے کہ شہریوں کے ووٹ دینے کے حق کو جسمانی رُکاوٹوں اور معذوریوں کا سامنا نہ کرنا پڑے۔ یہ کمیشن کے اس مقصد کو برقرار رکھتا ہے کہ کوئی بھی ووٹر پیچھے نہ رہ جائے۔اِس سہولیت سے فائدہ اُٹھانے کا طریقہ کار آسان لیکن مکمل ہے۔ اِنتخابی نوٹیفکیشن کے پانچ دِن کے اندر اہل رائے دہندگان کو فارم 12 ڈی مکمل کرکے ریٹرننگ آفیسر کے پاس جمع کرنا ہوگا۔ پی ڈبلیو ڈی کے رائے دہندگان اَپنی درخواستوں کے ساتھ ایک بنیادی ڈِس ایبلٹی سر ٹیفکیٹ جمع کرتے ہیں۔بوتھ لیول آفیسر مطلوبہ دستاویزات مکمل ہونے پر رائے دہندگان کی رہائش گاہ سے فارم 12 ڈی حاصل کرنے کا ذمہ دار ہے۔ اُمیدواروں کو جوابدہی اور شفافیت کو برقرار رکھنے کے لئے ا ن رائے دہندگان کی ایک فہرست موصول ہوتی ہے۔ اگر وہ چاہیں تو وہ عمل کی نگرانی کے لئے ایک نمائندے کا اِنتخاب کرسکتے ہیں۔اِس کے بعد پولنگ افسروں کی ایک ٹیم سیکورٹی اہلکاروں کے ساتھ ووٹ لینے کے لئے ووٹر کی رہائش گاہ پر جاتی ہے۔ اہم بات یہ ہے کہ رائے دہندگان کو مجوزہ دورے کے وقت سے پہلے مطلع کیا جاتا ہے جس سے وہ محفوظ اور آرام سے اَپنے حق رائے دہی کا اِستعمال کرنے کے لئے تیار ہوسکتے ہیں۔ ووٹرزطریقہ کار کو مزید تیز کرنے اور رسائی کو بہتر بنانے کے لئے ان دنوں کے بارے میں ایس ایم ایس کے ذریعے اطلاعات بھی حاصل کرسکتے ہیں جب ان کے گھرووٹنگ کی سہولیت فعال ہوگی۔ شفافیت کے لئے پورے عمل کی ویڈیو گرافی بھی کی جاتی ہے۔ہوم ووٹنگ کی فراہمی ایک ترقی پسند اَقدام ہے جس کا مقصد رائے دہندگان کو مزید بااِختیار بنانا ہے۔ واضح رہے کہ پی سی 4 ۔اودھمپور میں ہوم ووٹنگ کا عمل پہلے ہی شروع ہوچکا ہے جس میں کٹھوعہ ، اودھمپور ، رام بن ، ڈوڈہ اور کشتواڑ اَضلاع میں شناخت شدہ رائے دہندگان نے پوسٹل بیلٹ کے ذریعے اَپنا ووٹ ڈالنا شروع کیاہے۔