سرینگر۔۔۔۔۔12نومبر۔۔۔۔۔ سی این آئی۔۔۔۔۔۔۔ دورہ بھوٹان کے دو روزہ دورے سے واپسی کے فوراً بعد وزیر اعظم نریندر مودی نے ایل این جے پی اسپتال کا دورہ کیا جہاں انہوں نے لال قلعہ دھماکے میں زخمی افراد کی عیادت کی ۔ا س موقعہ پر ایک بار پھر انہوں نے واضح کیا کہ قصورواروں کو بخشا نہیں جائے گا اور انہیں انصاف کے کٹہرے میں کھڑا کیا جائے گا ۔ سی این آئی کے مطابق وزیر اعظم نریندر مودی دو روزہ دورے کے بعد بھوٹان سے واپس لوٹ آئیں جس دوران انہوں نے واپسی کے فورا بعد لال قلعہ میٹرو اسٹیشن کے قریب کار دھماکے میں زخمی ہونے والوں سے ملنے کیلئے نئی دہلی کے لوک نائک جئے پرکاش نارائن اسپتال کا دورہ کیا۔ دہلی کے ہوائی اڈے پر اترنے کے بعد وزیر اعظم نریند مودی سیدھے ایل این جے پی اسپتال پہنچے، جہاں انہوں نے کئی زخمیوں سے ملاقات کی اور ان کا حال دریافت کیا۔ انہوں نے ڈاکٹروں اور اسپتال کے اہلکاروں سے بات کی۔ متاثرین کو فراہم کی جانے والی طبی امداد کا جائزہ لیا۔ وزیراعظم نے ان کی جلد صحت یابی کے لیے نیک تمناو¿ں کا اظہار بھی کیا۔وزارت داخلہ نے دہشت گردی کے تعلق کے امکان کا حوالہ دیتے ہوئے تحقیقات قومی تحقیقاتی ایجنسی (این آئی اے) کو سونپ دی ہے۔ ابتدائی فرانسک رپورٹس بتاتی ہیں کہ دھماکے میں زیادہ تر متاثرین کے جسم کے اوپری حصے میں شدید چوٹیں آئیں، حالانکہ ان کے کپڑوں یا جسموں پر کوئی کرچ کے نشانات نہیں ملے۔ استعمال شدہ دھماکہ خیز مواد کی نوعیت کی تصدیق لیبارٹری تجزیہ کے بعد کی جائے گی۔ اپنے بھوٹان کے دورے کے دوران وزیر اعظم مودی نے اس سانحہ پر افسوس کا اظہار کرتے ہوئے اسے ”گھناو¿نا فعل“ قرار دیا اور ذمہ داروں کے خلاف ”سخت ترین کارروائی“ کا یقین دلایا۔ انہوں نے تھمپو میں کہا کہ قوم غم کی اس گھڑی میں متاثرہ خاندانوں کے ساتھ کھڑی ہے۔
دورہ بھوٹان کے دو روزہ دورے سے واپسی کے بعد وزیر اعظم مودی اسپتال پہنچے
