جموں…انفو …وزیر برائے خوراک، شہری رسدات و اَمورِ صارفین اور ٹرانسپورٹ ستیش شرما نے بلاک چکی چورا کے سیلاب سے متاثرہ علاقوں جن میں پنچایت رہ (گاو¿ں راہ) اور ہردو ملارہ (وارڈ نمبر 2 اور وارڈ نمبر 4) شامل ہیں، کا دورہ کیا تاکہ شدید بارشوں اور سیلاب کی صورت حال کا جائزہ لیا جاسکے۔وزیر موصوف کے ہمراہ ضلعی اِنتظامیہ، پی ایچ اِی، آر ڈِی ڈِی، پی ڈبلیو ڈِی، آبپاشی و فلڈ کنٹرول اور دیگر متعلقہ محکموں کے سینئر اَفسران بھی تھے۔اُنہوں نے دورے کے دوران متاثرہ کنبوں سے بات چیت کی اور ذاتی طور پر املاک، بنیادی ڈھانچے اور زرعی زمینوں کو پہنچنے والے نقصان کا جائزہ لیا۔ اُنہیں جانکاری دی گئی کہ متعدد کنبوں کو احتیاطی تدبیر کے طور پر محفوظ مقامات پر منتقل کیا گیا ہے جن میں گورنمنٹ ہائی سکول اور پنچایت گھر رہ سلیوٹ شامل ہیں تاکہ ان کی حفاظت کو یقینی بنایا جا سکے۔وزیر ستیش شرما نے ضلعی اِنتظامیہ اور متعلقہ حکام کو ہدایت دی کہ تمام متاثرہ کنبوں کو فوری ریلیف اور بحالی کی اِمداد فراہم کی جائے۔ اُنہوں نے زور دیا کہ راشن، پینے کا صاف پانی،رسوئی گیس اور طبی اِمداد جیسی بنیادی سہولیات متاثرہ اَفراد تک بلا تاخیر پہنچنی چاہئیں۔ اُنہوں نے متعلقہ اَفسران کو بجلی، سڑکوں کی بحالی اور پانی کی فراہمی جلد از جلد بحال کرنے کی بھی ہدایت دی۔اُنہوںنے اِس بات کا اعادہ کیا کہ شہریوں کی حفاظت اور فلاح و بہبود حکومت کی اوّلین ترجیح ہے اور لوگوں کو یقین دِلایا کہ ان کی امداد و بحالی کے لئے مناسب فنڈز اور وسائل فراہم کئے جائیں گے۔وزیر موصوف نے مزید ہدایت دی کہ املاک، مویشیوں، اور فصلوں کو ہوئے نقصانات کا جامع جائزہ لیا جائے تاکہ متاثرہ کنبوںکو بروقت معاوضہ دیا جا سکے۔ستیش شرما نے لوگوں سے اپیل کی کہ وہ حساس علاقوں میں چوکس رہیں اور کہا کہ اِنتظامیہ صورتحال پر قریبی نظر رکھے ہوئے ہے اور مزید مشکلات کو کم کرنے کے لئے ضروری اَقدامات اُٹھا رہی ہے۔
ستیش شرما نے چوکی چورا کے سیلاب سے متاثرہ علاقو ں کا کیا دورہ
