جموں …انفو …وزیربرائے تعلیم، سماجی بہبود، صحت و طبی تعلیم سکینہ اِیتو نے کہا کہ وزیر اعلیٰ عمر عبداللہ کی قیادت والی حکومت جسمانی طور خاص اَفراد کے حقوق اور ضروریات کے حوالے سے نہایت سنجیدہ ہے اور جموں و کشمیر بھر میں جسمانی طور خاص اَفراد(ایس اے پیز)کے لئے جامع اور قابل رسائی ماحول پیدا کرنے کی مسلسل کوششیں کی جا رہی ہیں۔وزیر موصوفہ نے اِن باتوں کا اِظہارکنونشن سینٹر میں جسمانی طور خاص اَفراد کے عالمی دِن کے مناسبت سے منعقدہ ایک شاندار تقریب سے خطاب کرتے ہوئے کیا۔سکینہ اِیتو نے تقریب سے خطاب کرتے ہوئے معذور افراد کے لئے جامع اور قابل رسائی ماحول پیدا کرنے کے لئے حکومت کے عزم کا اعادہ کیا اور کہا کہ بااختیاری، وقار اور مساوی مواقع حکومت کے تمام پروگراموں کے بنیادی اصول ہیں۔اُنہوں نے کہا، ”حکومت مسلسل یہ یقینی بنانے کے لئے کام کر رہی ہے کہ معذور افراد کو وہ مدد ، نگہداشت اور مواقع فراہم ہوں جن کے وہ حق دار ہیں۔“اُنہوں نے اس بات پر زور دیا کہ حکومت سکولوں میں خصوصی ضروریات کے حامل بچوں (سی ڈبلیو ایس این) کے لئے سہولیات کو مسلسل بہتر بنا رہی ہے تاکہ ُان کی تعلیم کے لئے ایک سازگار ماحول فراہم کیا جا سکے۔
جموںوکشمیر جسمانی طور پر خاص اَفراد کیلئے جامع ، قابل رسائی ماحول پیدا کرنے کیلئے مسلسل کوششیں جاری۔ سکینہ اِیتو
