سری نگر ۔۔۔ ۷، جنوری ۔۔۔ جے کے این ایس ۔۔۔ مرکزی وزیرداخلہ امت شاہ جمعرات کونئی دہلی میں ایک اعلیٰ سطحی میٹنگ میں جموں و کشمیر سیکورٹی صورتحال کا جائزہ لیں گے۔جے کے این ایس کے مطابق حکام نے بدھ کو بتایا کہ مرکزی وزیر داخلہ امت شاہ جمعرات کو نئی دہلی میں ایک اعلیٰ سطحی میٹنگ کی صدارت کریں گے جس میں جموں و کشمیر میں سیکورٹی صورتحال کیساتھ ساتھ وہاں جاری مختلف ترقیاتی پروجیکٹوںکی عمل آوری کا جائزہ لیا جائے گا۔اس میٹنگ میں جموں و کشمیر کے لیفٹیننٹ گورنر منوج سنہا،مرکزی داخلہ سیکرٹری گووندموہن، وزارت داخلہ کے اعلیٰ حکام، نیم فوجی دستوں اور انٹیلی جنس ایجنسیوں کے اعلیٰ افسران کے علاوہ جموں وکشمیرکے اعلیٰ سیول اور پولیس حکام بشمول چیف سیکرٹری اتل ڈولو اورڈی جی پی نلین پربھات بھی شرکت کریں گے۔حکام کے مطابق میٹنگ میں جموں وکشمیرکی موجودہ سیکورٹی صورتحال، انسداد دہشت گردی آپریشنز، بارڈر مینجمنٹ،سرحدپارسے دراندازی کی کوششوں،منشیات اسملگنگ اور جموں و کشمیر میں امن و امان کی مجموعی صورتحال پر توجہ مرکوز کرنے کی توقع ہے۔سینئرسیکورٹی حکام مرکزی وزیر داخلہ امت شاہ کو انسداد دہشت گردی کی جاری کارروائیوں، سرحدی انتظام کو مضبوط بنانے کے اقدامات اور لائن آف کنٹرول اور بین الاقوامی سرحد کے پار سے دراندازی کو روکنے کےلئے موسم سرما کے مہینوں میں اٹھائے گئے اقدامات کے بارے میں بریفنگ دیں گے۔حکام کے مطابق میٹنگ میں جموں وکشمیرمیں قیام امن کیلئے سیکورٹی ایجنسیوںکی جانب سے اُٹھائے جارہے اقدامات پر بھی غور کیاجائے گا جبکہ کشمیر وادی اور جموں خطے کے کچھ پہاڑی علاقوں میںموجوددہشت گردووں کیخلاف جاری کارروائیوں کا بھی جائزہ لیاجائے گا ،اور ساتھ ہی منشیات اسمگلنگ کا تدارک کرنے کیلئے سیکورٹی ایجنسیوںکی جانب سے روبہ عمل لائے جارہے اقدامات کابھی احاطہ کیاجائے گا۔قابل ذکر ہے کہ سیکورٹی ایجنسیوں کی جانب سے بتایاگیاہے کہ جموں وکشمیرمیں اسوقت کل50سے زیادہ غیرملکی دہشت گردسرگرم ہیں جبکہ مقامی سرگرم دہشت گردوںکی تعداد ایک درجن سے کم بتائی جاتی ہے ۔سیکورٹی ایجنسیوں نے سال2026میں جموں وکشمیرمیں دہشت گردی کو مکمل طور پر ختم کرنے کاہدف رکھاہے اوراس سلسلے میں 10مطلوب ترین غیر ملکی دہشت گردوںکی ایک فہرست مرتب کی گئی ہے ،جن کیخلاف جلد ہی فیصلہ کن آپریشن شروع کئے جائیں گے ۔
نئی دہلی میںمرکزی وزیرداخلہ امت شاہ کی زیرصدارت اعلیٰ سطحی میٹنگ
