صدر جمہوریہ نے بادامی باغ فوجی ہیڈ کواٹر میں شہیدوں کو خراج عقیدت پیش کیا

صدر جمہوریہ نے بادامی باغ فوجی ہیڈ کواٹر میں شہیدوں کو خراج عقیدت پیش کیا
سری نگر ….11 اکتوبر…یو این آئی….. صدر جمہوریہ ہند درو پدی مرمو اپنے دو روزہ دورہ جموں و کشمیر کے لئے بدھ کی صبح سری نگر پہنچیں۔جموں وکشمیر کے لیفٹیننٹ گورنر منوج سنہا نے سری نگر ہوائی اڈے پر ان کا استقبال کیا اس موقع پر وہاں چیف سکریٹری ارن کمار مہتا، جموں و کشمیر پولیس سربراہ دلباغ سنگھ، صوبائی کمشنر کشمیر وجے کمار بدھوری، ضلع مجسٹریٹ بڈگام اکشے لبرو و دیگر فوجی و پولیس افسران بھی موجود تھے۔سرکاری ذرائع نے بتایا کہ یونین ٹریٹری کے اپنے پہلے دورے پر انہیں گارڈ آف آنر پیش کیا گیا۔بعد ازاں صدر جمہوریہ سیدھے بادامی باغ فوجی چھاﺅنی, جو فوج کی 15 ویں کور کا ہیڈ کوارٹر ہے، پہنچی جہاں انہوں نے شہدا کی یاد گار پر شہیدوں کو خراج عقیدت پیش کیا۔لیفٹیننٹ گورنر نے ‘ایکس’ پر ایک پوسٹ میں کہا: ‘معزز صدر جمہوریہ محترمہ درو پدی مرمو کا سری نگر ہوائی اڈے پر پہنچنے پر پرتپاک استقبال کیا’۔سرکاری ذرائع کے مطابق صدر جمہوریہ سری نگر میں کشمیر یونیورسٹی کے 20 ویں کنوکیشن میں شرکت کے بعد راج بھون میں قبائلی گروپوں کے ارکان اور سیلف ہلپ گرپوں کی خواتین کے ساتھ بات چیت کی۔انہوں نے کہا کہ 12 اکتوبر کو وہ شری ماتا ویشنو دیوی مندر کا دورہ کریں گی جہاں وہ سر نو تعمیر شدہ پاروتی بھون اور سکائی واک کا افتتاح کریں گی۔دریں اثنا صدر جمہوریہ ہند کے دورے جمو وکشمیر کے پیش نظر وادی کشمیر بالخصوص شہر سری نگر کے قرب و جوار میں سیکورٹی کا فقید المثال بندوبست کیا گیا ہے۔یو این آئی کے ایک نمائندے کے مطابق شہر کے تمام علاقوں میں سیکورٹی کے سخت انتظامات کئے گئے ہیں اور ناکوں کے جال کو مزید وسیع کر دیا گیا ہے۔انہوں نے کہا کہ جدید ہتھیاروں سے لیس سیکورٹی اہلکار انتہائی چوکنا ہیں۔یو این آئی