میوہ ٹرکوں کے ہموار انخلاءکو یقینی بناناانتظامیہ کی اولین ترجیح/انشول گرگ

سری نگر….۶۱،ستمبر…جے کے این ایس …..ڈویڑنل کمشنر کشمیر انشول گرگ نے منگل کو کہا کہ انتظامیہ وادی سے پھلوں سے لدے ٹرکوں کے آسانی سے انخلاءکو یقینی بنانے کےلئے ترجیحی بنیادوں پر کام کر رہی ہے جبکہ کشمیر میں ضروری سامان کی روانی کو بھی برقرار رکھا جا رہا ہے۔ڈویڑنل کمشنر کشمیر فروٹ منڈی شوپیاں کا دورہ کیا اور کاشتکاروں و تاجروں کو درپیش ٹرانسپورٹ کے مسائل کا جائزہ لیا۔ انہوں نے کہا کہ اس وقت جموں سری نگر قومی شاہراہ سے ضروری ٹریفک گزر رہا ہے۔ جبکہ سیب سے لدے ٹرکوں کو مغل روڈ کے ذریعے منتقل کیا جا رہا ہے تاکہ دونوں راستوں پر ٹریفک کی روانی کو یقینی بنایا جا سکے۔جے کے این ایس کے مطابق صوبائی کمشنر کشمیرانشول گرگ نے شوپیان فروٹ منڈی میں پھل کاشتکاروں، انجمنوں اور شوپیاں فروٹ منڈی ایسوسی ایشن کےساتھ میٹنگوں کا ایک سلسلہ منعقد کیا۔ انہوں نے یہ بھی بتایا کہ لیفٹیننٹ گورنر اور چیف سیکریٹری نے صورتحال کا تفصیل سے جائزہ لیا ہے۔ ڈویڑنل کمشنر کشمیرکاکہناتھاکہ نقل و حرکت کو منظم کرنے کیلئے ایک نظام بنایا گیا ہے۔ کل(پیر) سے اب تک پھلوں سے لدے 1200 سے زیادہ ٹرکوں کو نکالا جا چکا ہے۔بارڈرروڈس آرگنائزیشن ، ٹریفک پولیس اور ضلعی حکام کے تعاون سے، مغل روڈ اور قومی شاہراہ کو جموں سے ضروری سامان اور بازاروں تک پھلوں کی نقل و حمل کو متوازن کرنے کےلئے ایک سرکیولر بہاو¿ میں منظم کیا جا رہا ہے۔ ڈویڑنل کمشنر کشمیرنے تسلیم کیا کہ کاشتکاروں کو سڑکوں کی بندش اور رکاوٹوں کی وجہ سے مشکلات کا سامنا کرنا پڑا ہے لیکن یقین دہانی کرائی کہ بحالی کا کام جاری ہے۔ انہوں نے مزید کہاکہ ہمارا کام تیل، ایل پی جی اور خراب ہونے والی اشیاءجیسی ضروری اشیاءکو لانے میں توازن پیدا کرنا ہے، ساتھ ہی جموں میں پھلوں کی بروقت انخلا کو بھی یقینی بنانا ہے۔کاشتکاروں کی درخواستوں کا جواب دیتے ہوئے، ڈویڑنل کمشنر کشمیر انشول گرگ نے نقصانات سے بچنے کے لئے نقل و حرکت کے اوقات میں عارضی نرمی کا اعلان کیا۔ انہوں نے کہا کہ ہم نے کچھ دنوں کےلئے نرمی کی اجازت دینے کا فیصلہ کیا ہے تاکہ کسی بھی پھل کاشتکار کو مشکلات کا سامنا نہ کرنا پڑے اور پھلوں کو محفوظ طریقے سے منتقل کیا جا سکے۔انہوں نے مزید بتایا کہ چیف سیکرٹری نے ٹریفک کے ضابطے کو بہتر بنانے کےلئے اقدامات کئے ہیں اور کاشتکاروں کے نقصانات کا منصفانہ جائزہ لیا جائے گا۔انشول گرگ نے کہاکہ تمام پھلوں سے لدے ٹرک اب آسانی سے چل رہے ہیں، اور کاشتکاروں، ٹریفک پولیس، بارڈرروڈس آرگنائزیشن اور ضلعی افسران کے مسلسل تعاون سے، ہمیں یقین ہے کہ کسی کو بھی غیر ضروری مسائل کا سامنا نہیں کرنا پڑے گا۔انہوں نے مزید بتایا کہ سری نگرجموں قومی شاہراہ پر مکمل ٹریفک بحال کرنے کےلئے اقدامات تیز رفتاری سے جاری ہیں۔ انشل گرگ نے فروٹ گروورز کو یقین دلایا کہ انتظامیہ سیب کے سیزن میں بغیر کسی رکاوٹ کے ٹرانسپورٹ کو یقینی بنانے کےلئے پرعزم ہے۔انہوں نے متعلقہ محکموں کو ہدایت دی کہ قریبی رابطے میں رہ کر پھل کی ترسیل بروقت اور محفوظ طریقے سے یقینی بنائی جائے۔ ڈویڑنل کمشنر کشمیر انشل گرگ نے کہا کہ قومی شاہراہ پر سیبوں کو ہوئے نقصان کا تخمینہ لگایا جائے گا اور امید ہے کہ کاشتکاروں کو معاوضہ فراہم کیا جائے گا۔واضح رہے کہ ایک روز قبل ہی ایل جی منوج سنہا نے کشمیر میں سیبوں سے بھری پہلی تاریخی ٹرین روانہ کی تھی۔ ٹرین کو ایل جی سنہا نے جھنڈی دکھا کر یہ کہتے ہوئے روانہ کیا تھا کہ اس سے جموں و کشمیر کی معیشت کو فروغ ملے گا۔ جموں و کشمیر کے لیفٹننٹ گورنر منوج سنہا نے ٹرین کو جھنڈی دکھا کر تاریخ رقم کی تھی۔ منوج سنہا نے کہا تھا کہ اس ٹرین کے متعارف ہونے سے کشمیر میں اقتصادی ترقی کا ایک نیا باب شروع ہوگا۔اس اقدام کا مقصد وادی کشمیر کے سیب کے پروڈیوسروں کی منڈی تک بروقت رسائی کو یقینی بنانا ہے، تاکہ کسانوں کو بہتر قیمتیں ملیں اور تازہ پھل آسانی سے صارفین تک مارکیٹ میں پہنچ سکیں اور دہلی کی منڈیوں میں سیب وقت پر دستیاب ہوں۔