پونچھ 17 ستمبر /انفو/وزیر اعلیٰ مسٹر عمر عبداللہ نے پونچھ ضلع کے کالا بن کا دورہ کیا تا کہ علاقے میں زمین کے دھنسنے سے ہونے والے نقصانات کا جائیزہ لیا جا سکے ۔ وزیر اعلیٰ کے ہمراہ وزیر جل شکتی ، جنگلات اور قبائلی امور مسٹر جاوید رانا ، ڈپٹی کمشنر پونچھ اور دیگر سینئرافسران بھی تھے ۔ وزیر اعلیٰ نے متاثرہ مقام کا ذاتی طور پر معائینہ کیا اور صورتحال کا براہ راست جائیزہ لیا ۔ انہوں نے مقامی لوگوں اور متاثرہ خاندانوں سے بات چیت کی اور انہیں حکومت کی طرف سے ہر ممکن تعاون کی یقین دہانی کرائی ۔ وزیر اعلیٰ نے متاثرہ خاندانوں کی فوری امداد کیلئے 38 لاکھ روپے کی منظوری دی جو کہ سٹیٹ ڈیزاسٹر ریسپانس فنڈ ( ایس ڈی آر ایف ) کے تحت پہلے سے منظور شدہ 50 لاکھ روپے کے علاوہ ہے ۔ انہوں نے زور دیا کہ مشکل وقت میں عوام کو زیادہ سے زیادہ امداد فراہم کرنا حکومت کا فرض ہے ۔ اپنی بات چیت کے دوران وزیر اعلیٰ نے کہا کہ حکومت متاثرہ خاندانوں کے ساتھ مضبوطی سے کھڑی ہے اور ان کی بحالی کیلئے تمام ضروری اقدامات یقینی بنائے گی ۔ اس سال جموں و کشمیر میں ہونے والی شدید بارشوں کے وسیع اثرات کو اجاگر کرتے ہوئے وزیر اعلیٰ نے کہا کہ تقریباً ہر ضلع میں انفراسٹرکچر اور نجی املاک کو نقصان پہنچا ہے ۔ انہوں نے مزید کہا کہ حکومت عوام کو ہر ممکن امداد فراہم کر رہی ہے اور حال ہی میں ایک مرکزی ٹیم نے جموں و کشمیر کا دورہ کیا تا کہ نقصانات کا جائیزہ لیا جائے ۔ انہوں نے امید ظاہر کی کہ جموں و کشمیر کیلئے پنجاب ، ہماچل پردیش اور اترا کھنڈ کی طرز پر ایک امدادی پیکج ملے گا ۔
