لیفٹیننٹ گورنر رام بن ۔گول روڈ پر بیلی برج کا کیااِفتتا ح

سری نگر…انفو….لیفٹیننٹ گورنرمنوج سِنہا نے پندرہ روزہ ’سیوا پکھواڑہ‘کے آغاز کے موقعہ پر رام بن ۔ گول روڈ پر بیلی پُل کا بذریعہ ورچیول موڈ اِفتتاح کیا۔لیفٹیننٹ گورنر نے یہ پُل رام بن کے لوگوں کو وقف کیا۔ اُنہوں نے پُل کی تعمیر میں انتھک محنت کرنے والے فوج کے بہادر اِنجینئروں کا شکریہ اَدا کیا جنہوں نے اِنتہائی مشکل حالات میں یہ کارنامہ انجام دیا۔اُنہوں نے کہا،”یہ پُل رام بن، سنگل دان اور گول علاقوں میں رہنے والے تقریباً 1.5 لاکھ لوگوں کے لئے اُمید کی کرن اور لائف لائن ہے۔ یہ پُل رابطے کو بہتر اور عوامی زِندگی کو آسان بنائے گا۔حالیہ آفاتِ سماوی نے لوگوں کی زِندگی کو بُری طرح متاثر کیا جس کے نتیجے میں بنیادی ڈھانچے کو نقصان پہنچا، معاشی مشکلات اور گول، سنگل دان و آس پاس کے علاقوں کو جوڑنے والے اہم راستوں میں رُکاوٹیں پیدا ہوئیں۔لیفٹیننٹ گورنر نے کہا ،”یہ بیلی پُل ہندوستانی فوج کی لگن، مہارت اور بے مثال خدمت کا مظہر ہے۔ہندوستانی فوج کی طرف سے متاثرہ کمیونٹیوں کے لئے اہم رابطے کی بحالی اور اِمداد نے اِس پورے خطے کو نئی اُمید دِی ہے۔“اُنہوںنے اِس موقعہ پر ہندوستانی فوج اور سول اِنتظامیہ کو بھی مُبارک باد دِی۔لیفٹیننٹ گورنرنے کہا کہ یہ پُل رام بن، سنگل دان، گول اور ملحقہ علاقوں کے درمیان رابطے کو بحال کرے گا جس سے ضروری سامان، طبی اِمداد اور ایمرجنسی خدمات تک بلا تعطل رَسائی ممکن ہوگی۔ اُنہوں نے مزید کہا کہ یہ پُل اِس بات کی علامت ہے کہ ضرورت کے وقت ہندوستانی فوج ہمیشہ ملک اور اس کے لوگوں کے ساتھ کھڑی ہوتی ہے۔اِفتتاحی تقریب میںجنرل آفیسر کمانڈِنگ (جی او سی) ڈیلٹا فورس میجر جنرل اے پی ایس بال، لیفٹیننٹ گورنر کے پرنسپل سیکرٹری ڈاکٹر مندیپ کے بھنڈاری، ضلع ترقیاتی کمشنر رام بن محمد الیاس خان، کمانڈر 11 سیکٹر آر آربریگیڈیئر کے ارون، ڈی آئی جی ڈوڈہ۔کشتواڑ۔رام بن رینج شری دھر پاٹل اور فوج، سول اور پولیس اِنتظامیہ کے سینئر اَفسران نے شرکت کی۔