سرینگر//شمالی کشمیر کے اُوڑی علاقے سے تعلق رکھنے والا ایک عوامی وفد آج سرینگر میں اپنی پارٹی کے صدر دفتر پر پارٹی سربراہ سید محمد الطاف بخاری سے ملاقی ہوا۔ اراکین وفد نے اُوڑی کے بیشتر علاقوں میں بنیادی سہولیات کے فقدان کو عوام کو درپیش مسائل سے سید الطاف بخاری کو آگاہ کیا۔موصولہ بیان کے مطابق اپنی پارٹی کے سربراہ نے اراکین وفد کی باتیں بغور سُنیں اور اُنہیں یقین دلایا کہ جن مسائل کی انہوں نے نشاندہی کرلی ہے، اُنہیں متعلقہ حکام کی نوٹس میں لایا جائے گا تاکہ ان کا فوری ازالہ ہو۔عوامی وفد نے سید بخاری کو بتایا کہ چونکہ اُوڑی وادی کا ایک دور دراز علاقہ ہے اس لئے یہ تعمیر و ترقی کے حوالے سے ہمیشہ حکام کی نظروں سے اوجھل رہا ہے۔
وفد نے کہا، “آزادی کے 75سال بعد بھی اوڑی خطہ ایک پسماندہ علا قہ ہے، جہاں لوگ بنیادی انفراسٹکچر کی قلت کی وجہ سے طرح طرح کے مسائل سے دوچار ہیں۔ خاص طور سے لوگوں کو تعلیمی اور طبی شعبے میں انفراسٹکچر کی قلت کی وجہ سے پریشانیوں کا سامنا کرنا پڑ رہا ہے۔ جبکہ کئی علاقوں میں لوگوں کو بجلی اور پانی کی سپلائی بھی مناسب طریقے سے میسر نہیں ہے۔”انہوں نے مزید کہا، “بونیار اوڑی کے لجارا گاوں اور اس کے گرد نواح کے علاقوں میں لوگوں کو مواصلاتی سہولیات بھی میسر نہیں ہیں کیونکہ ابھی یہاں ٹیلی کمونی کیشن کمپنیوں نے سگنل ٹاور تعمیر نہیں کئے ہیں۔
حکام ہمیشہ ہمارے علاقے کے ساتھ سوتیلی ماں کا سلوک کرتی رہی ہے۔”بخاری نے وفد کو یقین دلایا کہ نہ صرف اُن کے فوری مسائل کو حل کرانے کےلئے انہیں متعلقہ حکام کی نوٹس میں لایا جائے گا بلکہ اگر لوگوں نے آئندہ انتخاب میں اپنی پارٹی کو منتخب کیا تو اس خطے کی منصوبہ بند تعمیر و ترقی کا کام کرنے میں کوئی دقیقہ فرو گزاشت نہیں کیا جائے گا۔انہوں نے کہا، “اپنی پارٹٰی کا بنیادی ایجنڈا جموں کشمیر کی تعمیر و ترقی اور خوشحالی ہے۔ ہم ہر خطے کی یکساں ترقی اور بلا کسی امتیاز کے تمام لوگوں کی خوشحالی چاہتے ہیں اور اس کے لئے کام کررہے ہیں۔”
