سرینگر/20جنوری /انفو/ڈپٹی کمشنر بڈگام ڈاکٹر بلال محی الدین بھٹ نے ضلع ٹیلی کام کمیٹی (ڈی ٹی سی) کے ایک اہم اجلاس کی صدارت کی، جس میں ضلع میں موبائل ٹاورز کی تنصیب اور مجموعی ٹیلی کام انفراسٹرکچر سے متعلق مسائل کا تفصیلی جائزہ لیا گیا۔اجلاس کے دوران عوامی شکایات کے ازالے، مختلف محکموں کے مابین بہتر تال میل اور ٹیلی کام منصوبوں کی بروقت عمل آوری پر توجہ مرکوز کی گئی، جن میں جموں و کشمیر میں یو ایس او ایف 4جی سیچوریشن پروجیکٹ بھی شامل ہے۔ڈپٹی کمشنر نے اجلاس سے خطاب کرتے ہوئے کہا کہ مضبوط ٹیلی کام رابطہ نظام مو¿ثر حکمرانی، ہنگامی خدمات، تعلیم اور معاشی سرگرمیوں کے لیے ناگزیر ہے۔ انہوں نے تمام متعلقہ محکموں کو ہدایت دی کہ وہ حفاظتی، ماحولیاتی اور ضابطہ جاتی اصولوں کی مکمل پاسداری کے ساتھ ٹیلی کام سروس فراہم کرنے والی کمپنیوں کو بروقت منظوری اور تعاون فراہم کریں۔ڈی سی نے واضح کیا کہ ضلع ٹیلی کام کمیٹی موبائل ٹاورز اور دیگر ٹیلی کام معاملات سے متعلق عوامی شکایات کے ازالے کے لیے سنگل ونڈو نظام کے طور پر کام کرے گی۔ انہوں نے یہ بھی ہدایت دی کہ کمیٹی کے اجلاس باقاعدگی سے منعقد کیے جائیں تاکہ زیرِ التوا معاملات کی جلد از جلد یکسوئی ممکن بنائی جا سکے۔انہوں نے اس بات پر زور دیا کہ تمام محکمے باہمی اشتراک سے کام کریں، بالخصوص غیر مستفید اور کم سہولیات والے علاقوں میں ٹیلی کام منصوبوں کی بروقت تکمیل کو یقینی بنایا جائے، تاکہ ڈیجیٹل رابطہ بہتر ہو اور عوامی خدمات کی فراہمی میں بہتری آئے۔اجلاس میں ایڈیشنل ڈپٹی کمشنر بڈگام، سپرنٹنڈنگ انجینئر پی ڈبلیو ڈی بڈگام، چیف پلاننگ آفیسر، چیف میڈیکل آفیسر، اے ڈی جی (ایل ایس اے) جے اینڈ کے ڈپارٹمنٹ آف ٹیلی کمیونیکیشن، ایگزیکٹو انجینئر پی ڈی ڈی، ڈی ایف او بڈگام، ڈپٹی ایس پی ہیڈکوارٹر، ڈسٹرکٹ آفیسر پولیوشن کنٹرول بورڈ، ڈی آئی او این آئی سی بڈگام اور اربن لوکل باڈی/ڈویلپمنٹ اتھارٹی کے نمائندوں نے شرکت کی۔
ڈی سی بڈگام کی زیرِ صدارت ڈی ٹی سی اجلاس
