سری نگر//جے کے این ایس//30جون کوشروع ہونے والی43روزہ سالانہ امرناتھ یاترا کے پہلے3ہفتوںمیں 2لاکھ30ہزار کے لگ بھگ یاتریوںنے سطح سمند ر سے 3880میٹر بلندی پرواقع امرناتھ گھپا پہنچ کر یہاں شیولنگم کادرشن کیا اورخصوصی پوجاپاٹ میں شرکت کی ۔اس دوران29جون کویاتریوںکے پہلے قافلے کی روانگی سے ابتک یعنی21جولائی تک بھگوتی نگرجموںیاتری نوا س سے تقریباًڈیڑھ لاکھ یاتری نون ون پہلگام اوربال تل پہنچے ۔
جے کے این ایس کے مطابق8جولائی کوپیداشدہ سیلابی صورتحال اوردیگرموسمی عوامل کے باعث کم سے کم4دن امرناتھ یاترا معطل رہنے کے باوجود یہ 43روزہ سالانہ یاترا جاری ہے اور21جولائی کی شام تک امرناتھ گھپا پہنچ کردرشن کرنے والے یاتریوںکی تعدادتقریباً2لاکھ 30ہزار تک پہنچ گئی ۔
یاددرہے مقامی انتظامیہ کے اعلیٰ ذمہ داروںکویقین ہے کہ امسال امرناتھ یاترامیں پانچ لاکھ کے لگ بھگ لوگ شامل ہوں گے ۔ادھر حکام نے بتایاکہ بھگوتی نگرجموں سے یاتریوں کی آمد کاسلسلہ جاری ہے ۔انہوںنے بتایاکہ جمعرا ت کویہاں سے 4703یاتریوں پر مشتمل2قافلے سخت سیکورٹی بندوبست کیساتھ کشمیرکی جانب روانہ ہوئے ۔حکام نے کہاکہ صبح تقریباًساڑھے تین بجے روانہ ہونے والے 2001یاتریوںکی منزل بال تل بیس کیمپ اوردوسرے قافلے میں شامل 2702یاتریوںکی منزل نون ون پہلگام بیس کیمپ ہے ،جہاں سے یہ سبھی یاتری اگلے روز امرناتھ گھپا کی جانب روانہ ہونگے ۔
حکام کاکہناتھاکہ بدھ ے روز تقریباً11ہزار یاتریوںنے درشن کیا اوراس طرح سے بدھ کی شام تک درشن کرنے والے یاتریوںکی تعداد2لاکھ19ہزار سے زیادہ تھی ۔حکام نے بتایاکہ جمعرات کی صبح مزید دس ہزار سے زیادہ نون ون اوربال تل روانہ ہوئے اوراس طرح سے جمعرات کی شام تک امرناتھ گھپا میں شیولنگم کادرشن کرنے والے یاتریوںکی تعداد2لاکھ 30ہزار کے لگ بھگ ہوجائے گی ۔حکام کامزیدکہناتھاکہ دونوں راستوں پر یاتریوں کے لیے ہیلی کاپٹر خدمات دستیاب ہیں،اورخواہشمند یاتری اس سہولیت کااستفادہ حاصل کررہے ہیں ۔انہوںنے کہاکہ 43روزہ سالانہ امرناتھ یاترا11،اگست کورکھشا بندھن کے تہوار کے ساتھ شراون پورنیما پر اختتام پذیر ہوگی۔
