سری نگر//جے کے این ایس//شہرخاص کے خانیار علاقہ میں جمعرات کی صبح آتشزدگی کی ایک ہولناک واردات کے نتیجے میں ایک دارالعلوم کی عمارت اور2رہائشی مکانات مکمل طورپر معہ گھریلو سامان کے خاکستر ہوگئے جبکہ ایک شادی ہال اور2رہائشی مکانات کوبھی نقصان پہنچا۔جے کے این ایس کومعلوم ہواکہ خانیار سری نگر کے لون محلہ میں جمعرات کوصبح تقریباً7بجے ایک دارالعلوم کی عمارت سے آگ نمودار ہوئی ،جس نے آناًفاناًکئی نزدیکی مکانات اورایک میریج ہال کوبھی اپنی لپیٹ میں لے لیا۔
مقامی لوگوںنے بتایاکہ آگ نمودار ہوتے ہی اسکی اطلاع فائر اسٹیشن کودی گئی ،تاہم اس علاقے میں سڑکیں تنگ ہونے کے باعث فائرسروسزکی گاڑیوںکوجائے واردات پر پہنچنے میں کچھ زیادہ وقت لگا۔لوگوںنے بتایاکہ آگ بجھانے کی کارروائی روبہ عمل لانے سے پہلے ہی کئی مکانات شعلوںکی لپیٹ میں آچکے تھے ۔انہوںنے کہاکہ فائراینڈ ایمرجنسی سروسزکے اہلکاروںنے یہاں پہنچتے ہی آگ پرقابو پانے کی کارروائی مقامی نوجوانوںکے مکمل تعاون سے شروع کی ،جس وجہ سے آگ مزید پھیل نہ سکی ۔
لوگوںکے بقول تاہم بچائو کارروائی شروع ہونے تک ایک دارالعلوم کی عمارت اور2رہائشی مکانات مکمل طورپر خاکستر ہوگئے تھے تاہم باقی نزدیکی مکانات بشمول میریج ہال میں لگی آگ پرقابو پالیا گیا،جس وجہ سے شادی ہال اور2رہائشی مکانات کوزیادہ نقصان نہیںپہنچا۔لوگوںکاکہناتھاکہ لون محلہ خانیار میں جمعرات کی صبح آگ لگنے کے واقعے میں بلال احمد ہارون،منیر احمد ہارون، محمد یعقوب لون، مشتاق احمد دندرو،محمد انور داندرواور مشتاق احمد لون کے چار رہائشی مکانات کو
نقصان پہنچا۔ فائر اینڈ ایمرجنسی ڈیپارٹمنٹ کے اہلکاروں نے بتایا کہ بروقت کارروائی نے آگ کو مزید گھروں تک پھیلنے سے روک دیا۔ انہوںنے کہاکہتنگ گلیوں کی وجہ سے، عام فائر انجن کو موقع پر لے جایا جا سکتا تھا اور محکمے نے اسے ایک چھوٹے لوڈ کیریئر میں لے لیا۔انہوںنے کہاکہ مقامی لوگوں اور دیگر متعلقہ اداروں کی مدد سے آگ پر قابو پالیا۔ ان کا کہنا تھا کہ آتشزدگی کے واقعے میں کسی کے زخمی ہونے کی کوئی اطلاع نہیں ہے۔ آگ لگنے کی وجہ کے بارے میں پوچھے جانے پر انہوں نے کہا کہ پولیس اس کی تحقیقات کر رہی ہے۔
