جموں…..انفو…. وزیر برائے جل شکتی ،جنگلات و ماحولیات اور قبائلی امور جاوید احمد رانا نے سول سیکرٹریٹ جموں میں مختلف وفود اور اَفراد سے ملاقات کی تاکہ اُن کے مسائل اور شکایات سنی جا سکیں۔اراکین قانون ساز اسمبلی بشیر احمد ویری اور پیارے لال شرما نے بھی وزیرموصوف سے ملاقات کی اور اپنے اپنے حلقوں سے متعلق ترقیاتی مسائل کو اٹھایا۔ ملاقاتوں کے دوران وزیر جاوید رانا نے مختلف شراکت داروں کو بغور سُنا جن میں پی ایچ ای ڈیلی ویجرز یونین کے نمائندگان، آبپاشی و فلڈ کنٹرول (آئی اینڈ ایف سی) محکمہ سے وابستہ ٹھیکیداروں، سوشل فارسٹری ڈیپارٹمنٹ کے ملازمین اور عام لوگوںکے نمائندے شامل تھے۔پی ایچ اِی ڈیلی ویجرز یونین کے نمائندوں نے خدمات کی ریگولرائزیشن، واجبات کی ادائیگی، اور دیگر سروس سے متعلق مسائل اُٹھائے۔آئی اینڈ ایف سی محکمہ کے ٹھیکیداروں نے بروقت ادائیگی، ٹینڈرنگ کے طریقہ کار اور ترقیاتی کاموں کی آسانی سے عمل در آمد سے متعلق مسائل پیش کئے۔سوشل فارسٹری ڈیپارٹمنٹ کے ملازمین نے وزیر موصوف کو میدان میں درپیش چیلنجوں سے آگاہ کیا اور جنگلات و ماحولیاتی تحفظ کی سرگرمیوں کو مضبوط کرنے کی ضرورت پر زور دیا۔متعدد وفود اور اَفراد نے پانی کی فراہمی، سیلاب پر قابو پانے اور تخفیفی اقدامات، جنگلاتی وسائل کے تحفظ اور دیگر متعلقہ شعبوں سے متعلق شکایات کو بھی اُجاگر کیا۔جاوید رانا نے تمام وفود کو فوری اور منصفانہ کارروائی کی یقین دہانی کرتے ہوئے کہا کہ اٹھائے گئے ہر مسئلے کا ترجیحی بنیادوں پر جائزہ لیا جائے گا اور بروقت حل کیا جائے گا۔اُنہوں نے متعلقہ محکموں کے افسروں کو ہدایت دی کہ وہ شکایات کو فوری نوٹ کریں اور جلد از جلد ان کے ازالے بنانے کے لئے ضروری اقدامات شروع کریں۔وزیر موصوف نے عوامی خدمات کی فراہمی کو بہتر بنانے، بنیادی ڈھانچے کو مضبوط کرنے اور ماحولیاتی و جنگلاتی وسائل کے تحفظ کے ساتھ ساتھ ملازمین اورشراکت داروںکے مفادات و فلاح و بہبود کو یقینی بنانے کے لئے حکومت کے عزم کا اعادہ کیا۔اُنہوں نے حکمرانی میں شفافیت اور جوابدہی پر زور دیتے ہوئے کہا کہ انتظامیہ ایک جوابدہ اور عوام پر مبنی نظام قائم کرنے کے لئے پُرعزم ہے ۔
جاوید رانا نے عوامی شکایات کے بروقت ازالہ کی یقین دہانی کی
