جموںانفو25نومبر/لفٹینٹ گورنر منوج سنہا کی صدارت میں منعقدہ انتظامی کونسل ( اے سی ) نے جموں و کشمیر میں 4 نئی انڈسٹریل اسٹیٹس کے قیام کی انتظامی منظوری دی ۔ لفٹینٹ گورنر کے مشیر راجیو رائے بھٹناگر ، چیف سیکرٹری ڈاکٹر ارون کمار مہتا ، لفٹینٹ گورنر کے پرنسپل سیکرٹری ڈاکٹر مندیپ کمار بھنڈاری نے میٹنگ میں شرکت کی ۔ ان میں بودھی کٹھوعہ ، میڈیسٹی جموں ، چندگام اور لیہار پلوامہ میں صنعتی اسٹیٹس شامل ہیں جو 136.65 کروڑ روپے کی سرمایہ کاری سے 1379 کنال اراضی پر تیار کی جائیں گی ۔ سرمایہ کاری کو راغب کرنے کے ایک حصے کے طور پر یہ پروجیکٹ مقامی روز گار کو فروغ دیں گے اور توقع ہے کہ نجی شعبے میں 11497 سے زیادہ ملازمتیں پیدا ہوں گی ۔ نئی صنعتی اسٹیٹس کو بنیادی ڈھانچے اندرونی سڑک کے کام ، بجلی کی دستیابی ، پانی کی تقسیم کا مرکزی نظام ، بارش کے پانی کی ذخیرہ اندوزی ، سڑک کے کنارے ہریالی /شجرکاری وغیرہ کے لحاظ سے جامع طور پر تیار کیا جائے گا ۔ اس کے علاوہ ترقی میں نیشنل گرین ٹریبونل کے اصولوں کے مطابق نئے پیٹرن پر سینٹرلائزڈ ایفلوئنٹ ٹریٹمنٹ پلانٹس کا قیام اور جدید ترین ٹیکنالوجی پر دیگر سہولیات شامل ہوں گی ۔ منصوبوں کی تکمیل کی ٹائم لائن 18 ماہ ہو گی ۔ نئی صنعتی اسٹیٹس کا قیام جموں و کشمیر میں صنعتی ترقی اور کاروباری سرگرمیوں کو فروغ دینے کے حکومت کے عزم کے مطابق ہے ۔
جموں و کشمیر کے 3 اضلاع میں 4 نئی انڈسٹریل اسٹیٹس قائم کی جائیں گی
