بڈگام/ 28 مارچ/ ریاض بڈھانہ
بڈگام کے ہریوانی علاقے میں آج شام ایک تیندوے نے طیبہ مشتاق نامی لڑکی کو اپنا شکار بنایا جس کی عمر پانچ سال بتائی جاتی ہے ۔ معلومات کے مطابق تیندوا لڑکی کو اس کے گھر کے سہن سے اُٹھا لے گیا تھا تاہم پولیس اور وائلڈ لائف ٹیم کے ساتھ مقامی لوگوں کی بڑی تعداد نے لڑکی کی تلاش کے لیے علاقے میں تلاش شروع کر دی تھی بعد ازاں لڑکی کی لاش برآمد کر لی گئی۔
مقامی لوگوں کا کہنا ہے کہ اس علاقے کو اکثر جنگلی جانوروں سے خطرہ رہتا ہے کیونکہ اس میں جنگل کی نرسری بھی ہے جو جنگلی جانوروں کے لیے موزوں پناہ گاہ ہے۔
لوگوں نے حکام سے انسانی جانوں کے تحفظ کے لیے فوری اقدامات کرنے کی درخواست کی ہے۔
واضح رہے کہ ایک ہفتہ قبل اسی علاقے میں 9 سالہ بچی کو تیندوے نے موت کی گھاٹ اُتار دیا تھا جس کے بعد ایک اور واقعہ پیش آیا تھا جس میں تیندوے نے اسی گاؤں کے ثاقب ڈار کو زخمی کردیا تھا ۔
تاہم مقامی لوگوں کا یہ بھی کہنا تھا کہ یہ سب محکمہ جنگلی حیات کی غفلت کے باعث ہورہا ہے جو گزشتہ کئی دنوں سے تیندوے کو پکڑنے کی باتیں کر رہے ہیں لیکن پکڑنے میں ناکام رہے ہیں۔
