سری نگر….انفو…..لیفٹیننٹ گورنر منوج سِنہا نے سری نگر میں پہاڑی قبائلی کمیونٹی کے ایک اَجتماع سے خطاب کرتے ہوئے کہا،”دیرپا ترقی اور جامع خوشحالی کا ویژن جموں و کشمیر کی قبائلی کمیونٹی کے روشن مستقبل کی تشکیل کرے گا۔“ اُنہوں نے مزید کہا کہ پہاڑی قبائلی کمیونٹی کو مرکزی دھارے میں لانا مرکز کا عزم ہے اور ان کا بااختیار بنانا ایک مضبوط اور خوشحال یونین ٹیریٹری کی تعمیر کرے گا۔لیفٹیننٹ گورنر نے اَپنے خطاب کے شروعات میںوزیر اعظم نریندر مودی کے اُس تاریخی فیصلے کو یاد کیا جس کے تحت پہاڑی نسلی گروہوں کو درج فہرست قبائل کا درجہ دیا گیا۔ اُنہوں نے کہا کہ قبائلی کمیونٹیوں کا بااِختیار بنانا مرکزی حکومت کی اوّلین ترجیح ہے۔اُنہوں نے کہا،”کمیونٹی کی ترقی کو یقینی بنانے کے لئے مسلسل کوششوں کی ضرورت ہے جنہیں پارلیمنٹ نے گزشتہ برس شیڈولڈ ٹرائب کا درجہ دیا تھا کیوں کہ ان کی خوشحالی بنیادی طور پر ہمارے جامع ترقی کے ہدف سے جُڑی ہوئی ہے۔“لیفٹیننٹ گورنر نے پہاڑی کمیونٹی کے نمائندوں کی طرف سے پیش کی گئی مطالبات کا جواب دیتے ہوئے کہا کہ یہ یقینی بنایا جائے گا کہ پہاڑی نسلی گروہوں کو پارلیمنٹ کے منظور شدہ ایکٹ کے مطابق اَپنے حقوق حاصل ہوں۔اُنہوںنے قبائلی کمیونٹیوں اور سماج کے تمام طبقات پر زور دیا کہ وہ دہشت گردی کے خلاف متحد ہوجائیں اور اِنتہا پسند پروپیگنڈے کا فعال طور پر مقابلہ کریں تاکہ اَمن و استحکام کو محفوظ بنایا جا سکے۔لیفٹیننٹ گورنرنے کہا کہ کچھ تفرقہ پسند عناصر دہشت گرد تنظیم ٹی آر ایف جیسے جھوٹا بیانیہ پھیلا رہے ہیں ۔یہ ایک سنگین خطرہ ہے اور لوگوں کو اِس کا مقابلہ کرنا چاہیے۔اِس موقعہ پر لیفٹیننٹ گورنر منوج سِنہا نے بھگوان برسامنڈا کو خراجِ عقیدت بھی پیش کیا ۔ تقریب میں سابق نائب وزیر اعلیٰ مظفر حسین بیگ، سابق رُکن قانون ساز کونسل اور چیئرمین پہاڑی ویلفیئر سوسائٹی ظفر اِقبال منہاس، چیئرمین پہاڑی کلچر اینڈ ویلفیئر فورم راجا اعجاز علی، مختلف پہاڑی رہنما، نمایاں شخصیات اور پہاڑی قبائلی کمیونٹی کے بڑے پیمانے پر اَفراد اور زِندگی کے مختلف شعبوں سے تعلق رکھنے والے لوگ موجود تھے۔
پہاڑی قبائلی کمیونٹی کو مرکزی دھارے میں لانامرکز کا عزم /لیفٹنٹ گورنر
