جموں…….انفو……وزیر برائے خوراک، شہری رسدات و اَمورِ صارفین، اِنفارمیشن ٹیکنالوجی، اَمورِ نوجوان و کھیل کود ستیش شرما نے آج بارڈر سیکورٹی فورس (بی ایس ایف) کے کانسٹیبل راجب نونیان کو زبردست خراجِ عقیدت پیش کیا جنہوں نے 27 اگست کو جموں کے پرگوال سیکٹر میں بین الاقوامی سرحد کے ساتھ سیلابی حالات کے دوران اَپنی ڈیوٹی انجام دیتے ہوئے اپنی جان کا نذرانہ پیش کیا۔وزیر موصوف نے شہید سمارک بی ایس ایف فرنٹیئر ہیڈکوارٹرپلورا کیمپ جموں میں منعقدہ پُروقار تقریب میں شہید کی یاد میں پھولوں کی چادر چڑھائی اور بہادر سپاہی کے نقصان پرگہرے دُکھ کا اِظہار کیا۔اِس موقعہ پر ستیش شرما نے خطاب کرتے ہوئے کہا،”کانسٹیبل راجیب نونین نے مشکل حالات کا سامنا کرتے ہوئے مثالی ہمت اور فرض کے تئیں لگن کا مظاہرہ کیا۔ سرحد کی حفاظت اور قوم کی خدمت میں اُن کی عظیم قربانی ہمیشہ ہمارے اِجتماعی یادوں میں نقش رہے گی۔ اُنہوں نے فورس کی اعلیٰ روایات کو برقرار رکھا اور قوم ان کی بہادری کی ہمیشہ مقروض رہے گی۔“اُنہوں نے سوگوار کنبے سے دلی اِظہارِ تعزیت کی اور حکومت کی طرف سے ہر ممکن تعاون کی یقین دِلایا۔ اُنہوں نے مزید کہا کہ کانسٹیبل راجیب نونیان کی قربانی جموں و کشمیر اور پورے ملک کے نوجوانوں کو فرض، جرا¿ت اور حب الوطنی کے اَقدار پر قائم رہنے کے لئے ہمیشہ تحریک دیتی رہے گی۔بی ایس ایف، سول اِنتظامیہ کے سینئر اَفسران اور سول سوسائٹی کے اراکین نے بھی شہید کو خراجِ عقیدت پیش کیا۔
ستیش شرما نے بی ایس ایف کا نسٹیبل راجب نونیان کو خراجِ عقیدت پیش کیا
