جموں…..انفو….وزیر برائے خوراک ، شہری رسدات و اَمورِ صارفین ، ٹرانسپورٹ،اَمورِ نوجوان و کھیل کود اور اِنفارمیشن ٹیکنالوجی ستیش شرما نے جموں و کشمیر میں براڈ بینڈ نیٹ ورک کی توسیع اور ڈیجیٹل انفراسٹرکچر کو فروغ دینے پر زور دیا۔وزیر موصوف نیشنل براڈبینڈ مشن (این بی ایم)، ڈِپٹی ڈائریکٹر جنرل(ڈِی ڈِی جی) محکمہ ٹیلی کمیونی کیشنز کے ساتھ ایک میٹنگ میں گفتگو کر رہے تھے جس میں جموں و کشمیر میں ڈیجیٹل کنکٹویٹی کے روڈمیپ کا جائزہ لیا گیا اور اس میں تیزی لانے پر تبادلہ خیال کیا گیا۔میٹنگ میں محکمہ ٹیلی کمیونی کیشنز اور جموں و کشمیر کے اِنفارمیشن ٹیکنالوجی ڈیپارٹمنٹ کے سینئر اَفسران نے شرکت کی۔وزیر ستیش شرما نے تفصیلی بات چیت کے دورا ن ہائی سپیڈ اِنٹرنیٹ رسائی میں توسیع، ڈیجیٹل گورننس کے ڈھانچوں کو مضبوط بنانے اور جموں و کشمیر کی تمام کمیونٹیوں کے لئے مساوی ڈیجیٹل مواقع یقینی بنانے کے لئے حکومت کے مضبوط عزم پر زور دیا۔اُنہوںنے شہری مراکز اور دُور دراز دیہی علاقوں میں بھی براڈ بینڈ انفراسٹرکچر کے تیز رفتار نفاذ کی ضرورت پر زور دیا تاکہ شہری ڈیجیٹل خدمات، اِی۔لرننگ، ٹیلی میڈیسن اور ڈیجیٹل سکلنگ سے فائدہ اُٹھا سکیں۔وزیر موصوف نے کہا کہ آخری حدوں تک رسائی میں بہتری لانا بغیر کسی رُکاوٹ کے ڈیجیٹل خدمات کی فراہمی کے لئے نہایت ضروری ہے بالخصوص اُن علاقوں میں جہاں جغرافیائی چیلنجز زیادہ ہیں۔ اُنہوں نے آئی ٹی ڈیپارٹمنٹ اور ڈِی او ٹی کے درمیان مشترکہ کوششوں کی ضرورت پر زور دیا تاکہ رُکاوٹوں کو دور کر کے عمل درآمد کی رفتار کو بڑھایا جا سکے۔اُنہوں نے کاروبار میں آسانی پر حکومت کی توجہ کا اعادہ کرتے ہوئے اَفسران کو ہدایت دی کہ آر او ڈبلیو سہولیت کاری کے نظام کو مزید بہتر بنایا جائے تاکہ ٹیلی کام اِنفراسٹرکچر فراہم کرنے والوں کو بروقت اجازت مل سکے اور نیشنل براڈبینڈ مشن کے تحت پروجیکٹوں کی آسانی سے عمل آوری ہوسکے۔وزیر موصوف نے کہا کہ مضبوط، محفوظ اور مستقبل کے لئے تیار ڈیجیٹل اِنفراسٹرکچر کی تشکیل حکومت جموں و کشمیر کے لئے ترقیاتی ویژن کا بنیادی حصہ ہے۔ اُنہوں نے مزید کہا کہ مضبوط ڈیجیٹل کنکٹویٹی نوجوانوں کو بااِختیار بنانے، تعلیمی اِداروں کی مدد کرنے، عوامی خدمات کی فراہمی میں بہتری لانے اور معاشی ترقی کو ممکن بنانے کے لئے ضروری ہے۔اُنہوں نے یقین دِلایا کہ نیشنل براڈبینڈ مشن کے تمام اقدامات کے لئے حکومت کی مکمل حمایت حاصل رہے گی اور اُنہوں نے عالمی ڈیجیٹل رَسائی کے ہدف کو حاصل کرنے کے لئے محکموں کے درمیان مربوط کوششوں پر زور دیا۔میٹنگ میں موجودہ اقدامات کا جائزہ لیا گیا اور ایسے شعبوں کی نشاندہی کی گئی جہاںاین بی ایم کے ساتھ اشتراک سے جموں و کشمیر کے کم ترقی یافتہ علاقوں میں ڈیجیٹل خواندگی، ڈیجیٹل خدمات کی فراہمی اور کنکٹویٹی میں نمایاں بہتری آ سکتی ہے۔
ستیش شرما نے براڈ بینڈ کے توسیعی منصوبے اور ڈیجیٹل اِنفراسٹرکچر کو فروغ دینے پر زور
